+7 (701) 759 90 19
USD 425.3 EUR 501.05
RUB 5.85 CNY 65.88
Jańalyqtar

1 tamyz. Týǵan kún ıeleri

2021 jylǵy 1 tamyz 08:08
Bólisińiz:
1 tamyz. Týǵan kún ıeleri

NUR-SULTAN. QazAqparat - QazAqparat 1 tamyzǵa arnalǵan «Týǵan kún ıeleri» kúntizbesin usynady.

ESІMDER

128 jyl buryn (1893-1966) mýzyka aspabyn jasaýshy sheber, Qazaqstannyń eńbek sińirgen óner qaıratkeri, Qazaqstannyń dástúrli kóne mýzyka aspaptaryn jetildirý isimen aınalysqan tuńǵysh organolog, Baıan Ólgıı aımaǵynyń qurmetti azamaty Qamar QASYMOV dúnıege kelgen.

Pavlodar oblysynyń Baıanaýyl aýdanynda týǵan. 20 ǵasyrdyń 20-30-shy jyldaryndaǵy mádenı betburystardyń bel ortasynda bolyp, kóne qylqobyzdy, sal-serilerdiń toǵyz perneli qara dombyrasyn, ańshylyq pen saıatkerliktiń aıasynda ǵana qoldanylyp kelgen daýylpaz ben shyńdaýyldy, baqtashylardyń sybyzǵysyn klassıkalyq aspap dárejesine deıin jetildirip, orkestrlik shyǵarmalarǵa laıyqtap jasaǵan. Qasymov jasaǵan ulttyq aspaptar ár túrli deńgeıde ótken halyqaralyq kórmelerge qoıylǵan. Respýblıkamyzda alǵash ashylǵan mýzykalyq aspap jasaý sheberhanalarynyń isin jolǵa qoıyp, Qurmanǵazy atyndaǵy memlekettik halyq aspaptar orkestri men Jambyl atyndaǵy Qazaq fılarmonııasynyń jáne Qurmanǵazy atyndaǵy Almaty memlekettik konservatorııasynyń mýzykanttaryn orkestrlik úlgide jasalǵan mýzykalyq aspaptarmen qamtamasyz etken. Qasymov jasaǵan mýzykalyq aspaptar Máskeý, Sankt-Peterbýrg, Almaty, Semeı qalalaryndaǵy murajaılarda saqtaýly. Eńbek Qyzyl Tý ordenimen, medaldarmen jáne Mońǵolııa úkimetiniń eń joǵarǵy «Altyn gads» ordenimen marapattalǵan.

89 jyl buryn (1932-2013) kompozıtor, Qazaqstannyń Eńbek Eri, SSSR halyq ártisi, QazSSR Memlekettik syılyǵynyń laýreaty, professor Erkeǵalı Rahmadıuly RAHMADIEV dúnıege keldi.

Semeı oblysynyń Shubartaý aýdanyndaǵy bul kúnderi Mádenıet dep atalatyn aýylynda dúnıege kelgen. 1948 jyldyń maýsym aıynda kontserttik ansamblmen Nurǵısa Tilendıev, Beken Jylysbaev jáne baıanda oınaıtyn Konstantın Oshlakovtar aýylǵa keledi. Olardyń oıynda Balqash mańyndaǵy aýyldarǵa óner kórsetýmen qatar, P.I.Chaıkovskıı atyndaǵy ýchılıege daryndy jasóspirimderdi tańdap alý maqsaty da bar edi. Joǵary synyptardyń oqýshylaryn tyńdap, synaǵan komıssııa músheleri olardyń ishinen Erkeǵalımen qosa eseptegende tórteýin tańdap aldy. Erkeǵalı 1948 jyldyń kúzinde dombyra klasy boıynsha mýzykalyq ýchılıeniń oqýshysy bolyp qabyldandy. Ýchılıeni oıdaǵydaı támamdaǵan Erkeǵalı 1952 jyldyń jazynda emtıhandardy jaqsy tapsyryp, konservatorııa stýdenti atandy. Ol qabyldaý synynda qobyzǵa arnalǵan «Trıo» pesasyn jáne «Jasyl orman» ánin oryndady. Endi Erkeǵalı L.Hamıdıdiń usynysymen professor Evgenıı Brýsılovskııdiń klasynda ónerin jetildirýge kiristi. 1957 jyly Erkeǵalı Rahmadıev óziniń dıplomdyq jumysy retinde Memlekettik emtıhan komıssııasynyń aldyna «Qamar sulý» operasynyń birinshi bólimin usyndy. Onyń ustazy E.Brýsılovskıı keleshek Qazaqstannyń kórnekti kompozıtory bolatyndyǵyn tanyǵan-dy. Osy baǵytta bilimin damyta túsý úshin E.Rahmadıev P.I.Chaıkovskıı atyndaǵy Máskeý konservatorııasyna bir jyldyq tálim alýǵa keldi. 1962 jyly Máskeýde jas kompozıtorlar konkýrsynda Erkeǵalı Rahmadıevtiń «Balqashtaǵy kesh» atty horǵa arnalǵan poemasy birinshi dárejedegi dıplommen baǵalandy. «Qamar sulý» operasynyń 1963 jyldyń 15 sáýirinde Abaı atyndaǵy QMAOB teatrynda qoıylýy ony úlken shyǵarmashylyq shabytqa jeteleıdi. 1970 jyly kompozıtor orkestrdiń qoldaýymen trýbada oryndalatyn «Skertsony» vokaldyq-horeografııalyq «Qyzyl kıiz úı» kompozıtsııasyn, M.Áýezovke arnalǵan lırıkalyq poema-rekvıemin, «Aıastan» atty kantatasyn jáne dramalyq qoıylymdarǵa arnalǵan «Qabaǵan ıt», «Áke taǵdyry», «Suhbattasý» mýzykalaryn jaryqqa shyǵardy. 1972 jyly opera «Alpamys» támamdaldy, oǵan ilese shyǵarylǵan sımfonııalyq kúı «Daırabaı» oǵan úlken jetistik ákeldi. 1980 jyly Q.Muhamedjanovtyń lıbrettosy boıynsha «Tyń týraly» jańa operany ómirge ákeldi. 1980-jyldary Erkeǵalı Rahmadıevtiń trýbalyq orkestrdiń qostaýymen jáne skrıpkaǵa arnalǵan, orkestr demeýimen oryndalatyn kontserttik eki shyǵarmasy taǵy da ómirge keldi. Qyzdar pedagogıkalyq ınstıtýtynda oqytýshy bolǵan. 1958-1959 jyldary Almaty konservatorııasynda folklor kabınetin basqardy, Jambyl atyndaǵy Qazaq memlekettik fılarmonııasynyń jetekshisi, 1961-1965 jyldary Qazaq KSR-niń Mádenıet mınıstrliginde Kórkemóner bas basqarmasynyń bastyǵy, al 1966 jyly Abaı atyndaǵy opera jáne balet teatrynyń dırektory bolyp taǵaıyndaldy. 1967 jyly Qurmanǵazy atyndaǵy konservatorııanyń rektory, 1968 jyly Qazaqstan Kompozıtorlar odaǵynyń tóraǵasy jáne KSRO Kompozıtorlar odaǵynyń hatshysy. 1991-1993 jyldar aralyǵynda QR Mádenıet mınıstri. Jemisti eńbekteri úshin «Eńbek Qyzyl Tý», «Halyqtar dostyǵy», «Otan» ordenderimen, birneshe medaldarmen, Qazaq KSR-nyń jáne Armenııa, Ózbekstan, Estonııa respýblıkalarynyń, Tatar avtonomııalyq respýblıkasynyń maqtaý gramotalarymen marapattalǵan. 1966 jyly oǵan Qazaq KSR-nyń eńbek sińirgen mádenıet qaıratkeri, 1975 jyly Halyq ártisi, 1981 jyly KSRO halyq ártisi ataǵy berildi, al 1980 jyly Qazaq KSR memlekettik syılyǵy tapsyryldy. 2010 jyly Qazaqstannyń Eńbek Eri atandy.

60 jyl buryn (1961-2016) qoǵam qaıratkeri Salıdat Zekenqyzy QAIYRBEKOVA dúnıege kelgen.

Qaraǵandy oblysynda týǵan. 1984 jyly Qaraǵandy memlekettik medıtsına ınstıtýtyn «emdeý isi» mamandyǵy boıynsha, 2002 jyly E.A.Bóketov atyndaǵy Qaraǵandy memlekettik ýnıversıtetin quqyqtaný mamandyǵy boıynsha bitirgen.

Eńbek joly: 2001-2006 jyldary - Qazaq memlekettik medıtsına akademııasynyń qoǵamdyq densaýlyq jáne densaýlyq saqtaýdy basqarý kafedrasynyń izdenýshisi. 1984-1998 jyldary Qaraǵandy oblysynyń medıtsına uıymdarynda dáriger-nevropatolog, Qaraǵandy kópbeıindi emdeý-dıagnostıkalyq birlestigi bas dárigeriniń orynbasary bolyp jumys istedi. 1998-2001 jyldary - Qaraǵandy oblystyq densaýlyq saqtaý basqarmasynyń medıtsınalyq kómekti uıymdastyrý bóliminiń bastyǵy, Qaraǵandy oblystyq eńbek, jumyspen qamtý jáne halyqty áleýmettik qorǵaý basqarmasynyń № 5 medıtsınalyq-áleýmettik saraptama komıssııasynyń tóraıymy. 2001-2004 jyldary Qazaqstan Respýblıkasy Densaýlyq saqtaý mınıstrliginiń bólim bastyǵy, basqarma bastyǵy, Emdeý-profılaktıkalyq jumys departamenti dırektorynyń orynbasary, Mınıstrliktiń Apparat basshysy qyzmetin atqardy. 2004-2006 jyldary Qazaq memlekettik medıtsına akademııasynyń prorektory boldy. 2006-2008 jyldary - Qazaqstan Respýblıkasynyń Prezıdenti Ákimshiliginiń áleýmettik-ekonomıkalyq taldaý bóliminiń bas sarapshysy, bas ınspektory, áleýmettik-ekonomıkalyq monıtorıng bóliminiń sektor meńgerýshisi. 2008 jylǵy 4 jeltoqsannan bastap Qazaqstan Respýblıkasy Densaýlyq saqtaý mınıstrligi Medıtsınalyq qyzmet kórsetý salasyndaǵy baqylaý komıtetiniń tóraıymy. 2009 jylǵy 5 qazannan bastap Qazaqstan Respýblıkasy Densaýlyq saqtaý mınıstrligi Medıtsınalyq qyzmetke aqy tóleý komıtetiniń tóraıymy. 2010 jylǵy 23 sáýirinen Qazaqstan Respýblıkasynyń Densaýlyq saqtaý vıtse-mınıstri. 2010 jylǵy 7 qazannan Qazaqstan Respýblıkasynyń Densaýlyq saqtaý mınıstri. 2014-2015 jyldary Qazaqstan Respýblıkasy Densaýlyq saqtaý jáne áleýmettik damý mınıstrliginiń birinshi vıtse-mınıstri, 2015-2016 jyldary «Ulttyq medıtsınalyq holdıng» AQ basqarma tóraıymy boldy.

Medıtsına ǵylymdarynyń doktory. «Qurmet» ordenimen marapattalǵan.

50 jyl buryn (1971) Qazaqstan Respýblıkasynyń Portýgalııadaǵy Tótenshe jáne Ókiletti elshisi Dáýlet Qasekenuly BATYRAShEV dúnıege keldi.

Q.Sátbaev atyndaǵy Qazaq polıtehnıkalyq ınstıtýtyn, Qazaqstan Respýblıkasy Syrtqy ister mınıstrligi Dıplomatııalyq akademııasyn bitirgen. Injener-menedjer. Dıplomattyq dárejesi – ІІ synypty Tótenshe jáne ókiletti elshi.

MAD «Nevada-Semeı» úılestirý keńesi hatshylyǵynyń aýdarmashy-referenti, «Porshen-komplekt» óndiristik-kommertsııalyq ortalyǵy dırektorynyń syrtqy ekonomıkalyq baılanystar jónindegi orynbasary, QR Prezıdenti Apparaty halyqaralyq bóliminiń mamany, aǵa mamany, Ulybrıtanııa jáne Soltústik Irlandııa Birikken Koroldigindegi Qazaqstan Respýblıkasy Elshiliginiń attashesi, QR Syrtqy ister mınıstri hatshylyǵynyń ekinshi, birinshi hatshysy, QR Syrtqy ister mınıstriniń keńesshisi, QR Premer-Mınıstriniń kómekshisi, QR Syrtqy ister mınıstrligi apparatynyń basshysy, Amsterdam qalasyndaǵy QR Bas Konsýly, Nıderlandy Koroldigindegi Qazaqstan Respýblıkasynyń ýaqytsha senimdi ókili, Syrtqy ister mınıstrligi erekshe tapsyrmalar boıynsha Elshisi, Qazaqstan Respýblıkasy Parlamenti Senaty Tóraǵasynyń keńesshisi, Qazaqstan Respýblıkasynyń Rýmynııadaǵy Tótenshe jáne Ókiletti elshisi bolyp qyzmet atqarǵan. Eki medalmen marapattalǵan.

2019 jyldyń qyrkúıek aıynan bastap qazirgi qyzmetinde.

45 jyl buryn (1976) Qazaqstan Respýblıkasy Memlekettik qyzmet isteri agenttigi tóraǵasynyń orynbasary Darhan Medeǵalıuly JAZYQBAEV dúnıege kelgen.

Ál-Farabı atyndaǵy Qazaq ulttyq ýnıversıtetin, QR ІІM Qostanaı zań ınstıtýtyn bitirgen. Fılosof, fılosofııa pániniń oqytýshysy, zańger. Fılosofııa ǵylymdarynyń kandıdaty.

Qazaqstan Respýblıkasy Іshki ister mınıstrliginiń Almaty zań ınstıtýtynda, akademııasynda oqytýshysy, Іshki ister mınıstrliginiń erekshe tapsyrmalar jónindegi aǵa ınspektory, QR ІІM akademııasy Kadrlar jumysy bóliminiń bastyǵy, Parlamenti Senaty Apparaty Ákimshilik bólimi meńgerýshisiniń orynbasary, Kadr jumysy jáne memlekettik qupııalardy qorǵaý bóliminiń meńgerýshisi; «KEGOC» AQ basqarma tóraǵasynyń keńesshisi; Qazaqstan Respýblıkasy Parlamenti Senaty Apparaty Basshysynyń orynbasary, Qazaqstan Respýblıkasy Prezıdent Ákimshiliginiń Іshki saıasat bólimi meńgerýshisiniń orynbasary bolyp qyzmet istegen.

Qazirgi qyzmetin atqarýǵa 2019 jylǵy maýsymda kiristi.

«Qurmet» ordenimen, eki medalmen marapattalǵan.

43 jyl buryn (1978) Qazaqstan Respýblıkasy Qarjy naryǵyn retteý jáne damytý agenttiginiń tóraǵasy Mádına Erasylqyzy ÁBІLQASYMOVA dúnıege keldi.

«Halyqaralyq ekonomıkalyq qatynastar» mamandyǵy boıynsha Qazaq Memlekettik Basqarý akademııasynyń túlegi. 2002 jyly Kolýmbııa ýnıversıtetin aıaqtady. «Ekonomıkalyq saıasatty basqarý» mamandyǵy boıynsha halyqaralyq qatynastar magıstri. Sonymen qatar, «Memlekettik basqarý magıstri» mamandyǵy boıynsha Kennedı atyndaǵy Garvard Memlekettik basqarý mektebin aıaqtady.

1999-2003 jyldary aralyǵynda QR Strategııalyq josparlaý agenttiginde, Ekonomıka jáne bıýdjettik josparlaý mınıstrliginde jumys istedi. 2004-2006 jyldary «Marketıngtik-taldamalyq zertteýler ortalyǵy» AQ Memlekettik saıasatty taldaý departamentiniń dırektory. 2006 jyldyń aqpan aıynan bastap, QR Premer-Mınıstri Keńsesiniń áleýmettik-ekonomıkalyq bólimi meńgerýshisiniń orynbasary bolyp taǵaıyndaldy. 2008 jyldyń naýryz aıynan bastap, QR Prezıdenti Ákimshiliginiń strategııalyq ázirlemeler jáne taldaý ortalyǵy meńgerýshisiniń orynbasary. 2011 jyldyń qyrkúıek aıynda Qazaqstan Respýblıkasynyń Ekonomıkalyq damý jáne saýda vıtse-mınıstri bolyp taǵaıyndaldy. QR Ekonomıka jáne bıýdjettik josparlaý vıtse-mınıstri (2013-2014); QR Ulttyq ekonomıka vıtse-mınıstri (2014-2018); Qazaqstan Respýblıkasy Eńbek jáne halyqty áleýmettik qorǵaý mınıstri (2018-2019); Qazaqstan Respýblıkasy Ulttyq banki tóraǵasynyń orynbasary (03.2019-12.2019).

Qazirgi laýazymyn atqarýǵa 2019 jylǵy jeltoqsanda kiristi.

43 jyl buryn (1978) Pavlodar oblysy ákiminiń orynbasary Dınara Sháýálitqyzy ShAIMURATOVA dúnıege keldi.

Kókshetaý oblysynda týǵan. 2000 jyly Almaty tehnologııa jáne bıznes ýnıversıtetin «ekonomıst» mamandyǵy boıynsha, 2017 jyly Qarjy akademııasynyń magıstratýrasyn támamdaǵan.

Eńbek joly: 1997-2000 jyldary Almaty qalasynda, Almaty oblysynda salyq organdarynda qyzmet etti. 2000-2004 jyldary Qarjy polıtsııasy agenttiginde jumys istedi. 2004-2018 jyldary – QR Qarjy mınıstrligi býhgalterlik esep jáne esep berý basqarmasynyń basshysy, ishki qarjy ákimshilik departamentiniń basshysy. 2018-2021 jyldary – QR Qarjy mınıstrliginiń josparlaý jáne býhgalterlik esep departamentiniń basshysy.

Qazirgi qyzmetinde 2021jyldyń sáýir aıynan bastap.

39 jyl buryn (1982) Qazaqstan Respýblıkasy Parlamenti Májilisiniń VII shaqyrylymynyń depýtaty, Zańnama jáne sot-quqyqtyq reforma komıtetiniń múshesi Vakıl Gýseınovıch NABIEV dúnıege keldi.

Osh oblysynda ( Qyrǵyz KSR) týǵan. Bilimi joǵary. 2004 jyly Abaı atyndaǵy Almaty memlekettik ýnıversıtetin «halyqaralyq quqyq» mamandyǵy boıynsha, 2010 jyly «Turan» ýnıversıtetin «ekonomıst» mamandyǵy boıynsha, 2014 jyly Abaı atyndyǵy Qazaq ulttyq pedagogıkalyq ýnıversıtetin «mádenıettaný» mamandyǵy boıynsha, 2017 jyly Qazaq ulttyq pedagogıkalyq ýnıversıtetin «saıasattaný» mamandyǵy boıynsha bitirgen.

Eńbek joly: 2005-2011 jyldary – «ABS Stroı» JShS dırektorynyń orynbasary. 2011-2012 jyldary – Qazaqstan Respýblıkasy Qarjy mınıstrligi Qazynashylyq komıtetiniń Almaty qalasy boıynsha departamentiniń quqyqtyq qyzmet bóliminiń bas ıýrıskonsýlty. 2012-2014 jyldary – Qazaqstan halqy Assambleıasy «Jarasym» respýblıkalyq jastar uıymy tóraǵasynyń orynbasary. 2014 jyldan bastap Qazaqstan halqy Assambleıasynyń janyndaǵy «Qazaqstan kúrdteriniń qaýymdastyǵy «Barbang»» respýblıkalyq qoǵamdyq birlestiginiń vıtse-prezıdenti. 2016-2018 jyldary – Qazaqstan halqy Assambleıasy «Jarasym» respýblıkalyq jastar uıymy tóraǵasynyń orynbasary. 2016-2021 jyldary – «Qazaqstan kúrdteriniń qaýymdastyǵy «Barbang» respýblıkalyq qoǵamdyq birlestiginiń Almaty qalalyq bóliminiń tóraǵasy.

Qazirgi qyzmetinde 2021 jyldyń qańtar aıynan bastap.

«Qazaqstan halqy Assambleıasynyń qoǵamdyq «Birlik» altyn medalimen jáne «Qazaqstan halqy Assambleıasyna 20 jyl», «Qazaqstan Respýblıkasynyń táýelsizdigine 25 jyl»,»Qazaqstan halqy Assambleıasyna 25 jyl» merekelik medaldarymen, Qazaqstan Respýblıkasy Prezıdentiniń, Qazaqstan halqy Assambleıasynyń, «Nur Otan» partııasynyń Alǵys hattarymen marapattalǵan.


Bizdiń kanalymyzǵa jazylyńyz:

Bólisińiz:

Avtor:

Aıaýlym Altynbek

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT