1 myńnan astam jumysshy Almaty kóshelerin qardan tazartýda

ALMATY. QazAqparat – Almatyda qar tazalaýǵa 574 arnaıy tehnıka men 1190 jumysshy jumyldyryldy, dep habarlaıdy QazAqparat tilshisi.

Almatyda 4 jeltoqsan kúni keshkisin jaýa bastaǵan qar áli de toqtaǵan joq. Osy aralyqta qalaǵa 4-6 sm, taýly aýdandarda 8-10 sm, taý bókterine 14-16 sm qar túsken.

Kóktaıǵaqtyń aldyn alý úshin qar jaýǵan kezden bastap joldarǵa, qıylystarǵa, jolaıyryqtarynan túser jerge arnaıy materıaldar shashyldy.

Trotýarlardy, jaıaý júrginshiler aımaqtaryn, qoǵamdyq kólik aıaldamalaryn, avtoturaqtardy qardan tazartý jalǵasýda.

Túngi qar shyǵarý jumystaryna 537 tehnıka, onyń ishinde 200 qumlaqtyrǵysh jáne 576 jol jumysshysy jumyldyrylǵan bolatyn.

5 jeltoqsan kúni 574 arnaıy tehnıka men 1190 jol jumysshysyn tartý josparlanǵan.

Qazgıdromettiń boljamy boıynsha, búgin aýa temperatýrasy kúndiz -1, -3. Qar jaýady.

Aýdandyq ákimdikter men qala ákimdiginde qar shyǵarý jumystaryn táýlik boıy baqylaıtyn kezekshilik uıymdastyrylǵan.