1 qazannan bastap jedel-izdestirý qyzmeti qyzmetkerleriniń eńbekaqysy kóteriledi
2022 jylǵy 23 maýsym 15:38

1 qazannan bastap jedel-izdestirý qyzmeti qyzmetkerleriniń eńbekaqysy kóteriledi

NUR-SULTAN. QazAqparat - 1 qazannan bastap jedel-izdestirý qyzmeti qyzmetkerleriniń eńbekaqysy kóteriledi. Bul týraly Qazaqstan Prezıdenti Qasym-Jomart Toqaev Qazaqstan polıtsııasynyń 30 jyldyǵyna arnalǵan saltanatty jıynda aıtty, dep habarlaıdy QazAqparat.

– Biz tártip saqshylaryn qoldaýǵa árdaıym erekshe kóńil bólemiz. Keıingi jyldary polıtsııa qyzmetkerleriniń jalaqysy birneshe ret ósip, turǵyn úıdi jalǵa alý qunyna ótemaqy tóleý engizildi. Sonymen qatar ákimderge jergilikti bıýdjet esebinen qarjylandyrylatyn qyzmetterge 30 paıyzdyq ústemaqy belgileý quqyǵy berildi. Meniń tapsyrmama sáıkes bıylǵy 1 qazannan bastap jedel-izdestirý qyzmeti qyzmetkerleriniń eńbekaqysy kóteriledi. Biz polıtsııa qyzmetkerlerin quqyqtyq jáne áleýmettik turǵydan qorǵaýdy jaqsartý úshin keshendi sharalardy jalǵastyramyz, – dedi Memleket basshysy.

Prezıdent quqyq qorǵaý organdarynda qyzmet atqarýdyń jastar úshin tartymdy ári mártebeli bolýy mańyzdy dep esepteıdi. Úzdik polıtseılerdi kótermelep, erekshelep, marapattaý isin qoldaıtynyn bildirdi. Sondaı-aq quqyq qorǵaý organdaryndaǵy qyzmet tek artyqshylyq pen abyroı ǵana emes, halyq aldyndaǵy úlken jaýapkershilik ekenin túsiný kerek dep atap ótti.

Qasym-Jomart Toqaev Іshki ister mınıstrligi kadrlyq áleýetti udaıy jetildirýdi, qyzmetkerlerdiń kásibı biliktiligin jáne moraldyq rýhyn nyǵaıtýdy qamtamasyz etýi qajet ekenin aıtty. Qazaqstan polıtsııasynda otansúıgishtiktiń, ashyqtyqtyń, árqashan adamdarǵa kómekke kelýge daıyn turatyn adaldyqtyń obrazy qalyptasýy kerek. Bul barlyq tártip saqshylarynyń oılaý júıesi men minez-qulqyna túbegeıli ózgerister engizýdi talap etedi.

Aıta keteıik, osydan týra 30 jyl buryn Qazaqstan polıtsııasy qurylǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT