Жозеп Боррель: Қозоғистон Европа Иттифоқининг Марказий Осиёдаги энг йирик савдо шеригидир
13:23, 17 Ноябр 2022
BRUSSELS. Kazinform - Европа Иттифоқининг Ташқи ишлар ва хавфсизлик сиёсати бўйича Олий вакили Жозеп Боррель бугун Қозоғистонга ташриф буюради. Ушбу муҳим ташриф арафасида мартабали меҳмон Kazinform мухбирига берган эксклюзив суҳбатида Қозоғистон-Европа Иттифоқи алоқаларини юқори баҳолади.
«Бизнинг асосий ютуқларимиздан бири 2020 йил март ойида Европа Иттифоқи ва Қозоғистон ўртасида кенгайтирилган шериклик ва ҳамкорлик тўғрисидаги битимнинг кучга кириши бўлди. 2015 йил декабр ойида Қозоғистон Марказий Осиёда Европа Иттифоқи билан кенгайтирилган шериклик ва ҳамкорлик тўғрисидаги битимни имзолаган биринчи давлат бўлди»
, - деди Жозеп Боррель.
Унинг айтишича, ўттиз йил ичида икки томонлама муносабатлар сезиларли даражада ривожланди. Европа Иттифоқи Қозоғистоннинг энг йирик савдо ва сармоявий шериги бўлиб, Қозоғистонга киритилган тўғридан-тўғри хорижий инвестицияларнинг ярмидан кўпи Европа Иттифоқи ҳиссасига тўғри келади.
«Айни пайтда Қозоғистон Европа Иттифоқининг Марказий Осиёдаги энг йирик савдо шериги ҳисобланади. Қозоғистон Европа Иттифоқига ишончли энергия етказиб берувчи бўлган ва шундай бўлиб қолади. Сўнгги пайтларда экологик тоза хомашё, аккумулятор ва қайта тикланадиган водород соҳасида ҳамкорликни фаоллаштирдик. Хом ашё билан барқарор таъминлаш Қозоғистонда ҳам, Европа Иттифоқида ҳам декарбонизация жараёнини тезлаштиришга ёрдам беради. «Erasmus+» лойиҳаси Қозоғистон ва Европадаги талабалар ёки олимларга 4800 дан ортиқ стипендия таклиф қилди. Шунингдек, инсон ҳуқуқлари, қонун устуворлиги ва самарали бошқарув соҳасидаги ҳамкорликни мустаҳкамладик. Биз кучли минтақавий ҳамкорликни йўлга қўйдик. Биз ҳозирги геосиёсий контекстдан хавотирдамиз ва минтақаларимизда хавфсизлик, барқарорлик ва тинчликни мустаҳкамлашдан икки томон ҳам манфаатдормиз. Яқин келажакда Самарқандда бўлиб ўтадиган «Европа Иттифоқи – Марказий Осиё» вазирлари учрашувида минтақавий масалаларни муҳокама қилиш имконига эга бўламиз»
, - деди ЕИ бош дипломати.
Муаллиф: Айжан Серикжанқизи