Жорий йилда Семейда 30 та янги автобус харид қилинади

SEMEY. Kazinform – Семей шаҳрида йил охиригача 30 та янги автобус харид қилинади, деб хабар беради Kazinform мухбири.

Шаҳар ҳокимлиги матбуот хизмати хабарига кўра, йил охиригача Семейдаги автопарклар янги автобуслар билан тўлдирилади.

«Қўшимча 30 та автобус харид қилиш ва шаҳар бўйлаб жамоат транспорти сонини кўпайтириш режалаштирилган. Транспортчилар келгуси йил бошида яна янги автобуслар олиш ниятида. Мазкур чора автобуслар ҳаракати частотасини ошириш ва шаҳар жамоат транспорти билан боғлиқ муаммоларни қисман ҳал қилиш имконини беради», - дейилади хабарда.

Шунингдек, шаҳар ҳокими Нурбол Нурсағатов «Daewoo Bus Kazakhstan» автобус заводига ташриф буюрди. Ушбу ташриф давомида шаҳар автотураргоҳини тўлдириш масаласи муҳокама қилинди.

Муаллиф: Талғатжан Мухаметбекули