Жорий йилда агросаноат мажмуасида 291 инвестиция лойиҳаси амалга оширилади

ASTANA. Kazinform – ҚР Қишлоқ хўжалиги вазири вазифасини бажарувчи Ербол Қарашўкеев озиқ-овқат хавфсизлиги масаласини комплекс тарзда ҳал қилиш йўлларини айтиб ўтди, деб хабар беради Kazinform мухбири.

«Озиқ-овқат хавфсизлиги масаласи ҳар томонлама ҳал қилинади. Жорий йилда йил охиригача агросаноат мажмуасини ривожлантириш бўйича 536 миллиард тенгелик 291 та инвестиция лойиҳаси амалга оширилади. Умуман олганда, 2023-2026 йилларда умумий қиймати 2,6 триллион тенге бўлган 700 та инвестиция лойиҳасини амалга ошириш режалаштирилган», - деди Ербол Қарашўкеев Ҳукумат йиғилишида.

Унинг таъкидлашича, агросаноат мажмуаси субъектларига кредит 2,5 фоиз ставкаси билан 10 йилгача муддатга берилади.

«Сут, парранда гўшти, сабзавот импорти ўрнини босувчи йирик саноат инвестиция лойиҳаларини илгари суриш мақсадида Шимолий Қозоғистон вилояти тажрибаси бошқа ҳудудларга ҳам жорий этилади. Унга кўра, вилоят ҳокимликлари агросаноат мажмуи субъектларига 10 йил муддатга соддалаштирилган усулда қайтариладиган кредит (0,01 фоиз ставка) ажратмоқчи. Жорий йилда бу мақсадда 100 миллиард тенге ажратилди. Унинг ҳисобидан 65 га яқин товар сут-сутчилик фермаси қурилиши молиялаштирилади. Бу сут ишлаб чиқариш ҳажмини камида 373 минг тоннага ошириш имконини беради», - дейди у.

Е. Қарашўкеевнинг айтишича, юқорида қайд этилган чора-тадбирлар қишлоқда бир томондан йил давомида бандликни таъминласа, иккинчи томондан импортга қарамликдан халос бўлиш имконини беради.

Муаллиф: Даулет Изтилеу