Ўзбекистонда янги йилдан бошлаб паспорт ўрнига ID-карталари берилади
Биометрик паспортлар ўрнига Ўзбекистон фуқаросининг шахсини ва фуқаролигини тасдиқлайдиган электрон ташувчи қурилмага эга ҳужжат сифатида ID-карта жорий этилмоқда.
Ҳужжатга кўра, идентификация ID-карталари белгиланган ҳужжатлар қабул қилиб олингандан сўнг 1 иш куни мобайнида расмийлаштириб берилади.
Фармонда айтилишича, идентификация ID-картасининг бланкасида эгасининг миллати ҳақидаги маълумотлар кўрсатилмасдан ID-картанинг чипига киритилади.
Биометрик паспортлар ҳамда яшаш гувоҳномалари ID-карталарга 2 босқичда алмаштирилади:
1-босқич. 2021 йил 1 январдан 2022 йил 31 декабргача ихтиёрийлик асосида (16 ёшга тўлганда ёки қонунчиликда кўрсатилган бошқа сабабларга кўра);
2-босқич. 2023 йил 1 январдан 2029 йил 31 декабргача мажбурий тартибда.
Ўзбекистон фуқаросининг 2011 йил намунасидаги биометрик паспорти 2030 йил 1 январдан бошлаб ҳақиқий эмас деб ҳисобланади.
ID-карталарни олиш ва алмаштириш учун Ўзбекистон фуқароси хоҳлаган ички ишлар органларининг миграция ва фуқароликни расмийлаштириш бўлинмаларига мурожаат қилиши мумкин.