Ўзбекистонда трактор ишлаб чиқариш 72,5 фоизга камайган
13:55, 21 Сентябр 2021
TASHKENT. Kazinform – Ўзбекистон Давлат статистика қўмитаси жорий йилнинг 8 ойида мамлакатда қанча трактор ва култиватор ишлаб чиқарилганини маълум қилди, деб хабар беради Kazinform қўмитанинг расмий Telegram-каналига таяниб.
Давлат статистика қўмитаси маълумотларига кўра, қишлоқ хўжалиги техникаси ишлаб чиқариш саноатида 2021 йилнинг январь-август ойларида 173 дона трактор ишлаб чиқарилган.
Трактор ишлаб чиқариш ўтган йилнинг мос даври билан солиштирилганда 72,5 фоизга камайган.
Ишлаб чиқарилган тракторлар сони (январь-август ойларида):
2019 йил - 983 дона;
2020 йил - 630 дона;
2021 йил - 173 дона.
Эслатиб ўтамиз, 2021 йилнинг январь-август ойларида қишлоқ хўжалиги техникаси ишлаб чиқариш саноатида жами 383 дона култиватор ишлаб чиқарилган. Бу кўрсаткич ўтган йилнинг мос даврига нисбатан 43,1 фоизга камайган.