Ўзбекистонда 2023 йилдан «Олтин қалам» бош мукофоти соҳибига автомобиль берилади
28 Июнь 11:19

Ўзбекистонда 2023 йилдан «Олтин қалам» бош мукофоти соҳибига автомобиль берилади

TASHKENT. Kazinform – Ўзбекистонда 2023 йилдан «Олтин қалам» соҳибларининг пул мукофоти оширилади, қолаверса, бош мукофот соҳибига автомобиль берилади. Ҳар чоракда ОАВларда эълон қилинган энг яхши материаллар муаллифлари 15 млн сўмгача, болаларга мўлжалланган теле ва радио маҳсулотлар ижодкорлари эса 90 млн сўмгача рағбатлантирилади, деб хабар беради Kazinform gazeta.uzга таяниб.

«Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида»ги ЎР Президент қарори қабул қилинди.

Қарорга мувофиқ, 2022 йил 1 июлдан 2025 йил 1 июлгача:

- оммавий ахборот воситалари фойда солиғини 50 фоиз камайтирилган ҳолда тўлайди;

- Ўзбекистонда ишлаб чиқарилмайдиган матбаа ускуналари, замонавий фото ва радиотелевизион ускуналар ҳамда қоғоз божхона божидан озод этилади.

2023 йилдан давлат органлари ва ташкилотларига 110 нусха босма нашрлар ва 67 нусха китоб маҳсулотларининг мажбурий бепул нусхаларини юбориш бекор қилиниб, давлат органлари томонидан босма маҳсулотларни харид қилиб олиш тартиби жорий қилинади.

2022 йил 1 октябрдан болалар учун мўлжалланган теле- ва радиомаҳсулотларни ишлаб чиқариш ва эфирга узатиш бўйича ҳар йили энг яхши 30 та лойиҳа учун ҳар бири БҲМнинг 300 бараваригача (90 млн. сўмгача) бўлган танлов эълон қилинади.

Ҳар чоракда ОАВда эълон қилинган 100 тагача энг яхши материал учун муаллифлар БҲМнинг 50 бараваригача (15 млн сўмгача) миқдорда пул билан тақдирланади.

2023 йилдан «Олтин қалам» миллий мукофоти совриндорлари:

- бош миллий мукофот учун – автомобиль;

- 1-ўрин учун – БҲМнинг 200 баравари (60 млн сўм);

- 2-ўрин учун – БҲМнинг 175 баравари (52 млн 500 минг сўм);

- 3-ўрин учун – БҲМнинг 150 баравари (45 млн сўм);

- 12 та рағбатлантирувчи номинациянинг ҳар бири учун – БҲМнинг 100 баравари (30 млн сўм) миқдорида пул мукофоти билан тақдирланади.


Ўхшаш янгиликлар

Янгиликлар

Архив