Ўзбекистон Жаҳон савдо ташкилотига аъзо бўлиш бўйича музокараларни тезлаштиришни режалаштирмоқда

TASHKENT. Kazinform – Шавкат Мирзиёев «Ўзбекистон Республикасининг Жаҳон савдо ташкилотига кириш жараёнини тезлаштириш бўйича қўшимча чора-тадбирлар тўғрисида»ги қарорни имзолади, деб хабар беради Kazinform мухбири.

Ҳужжатга кўра, Жаҳон савдо ташкилоти (ЖСТ) билан ишлаш бўйича идоралараро комиссия ва музокаралар гуруҳи таркиби ўзгаради. Шунингдек, Президент Администрацияси тузилмасига Президентнинг ЖСТ масалалари бўйича махсус вакили лавозими киритилди. Унга аввал Президент Администрациясининг масъул ходими бўлган Азиз Урунов тайинланди. Махсус вакил музокаралар гуруҳи раҳбари, шунингдек, ЖСТ билан ишлаш бўйича идоралараро комиссия раисининг ўринбосари ҳисобланади.

Бундан ташқари, Инвестициялар, саноат ва савдо вазирлиги тузилмасида ЖСТ билан меҳнат ва савдо музокаралари департаменти, ҳамда, 20 та вазирлик ва идораларда ЖСТ масалалари бўйича бошқармалар ташкил этилади.

ЖСТ масалалари бўйича биринчи котиб лавозимлари Ўзбекистон Республикасининг Женева шаҳридаги БМТ ва бошқа халқаро ташкилотлардаги доимий ваколатхонасида жорий этилади.

Адлия вазирлиги миллий қонунчиликни ЖСТ келишувларига мувофиқлаштириши керак. Жорий йилнинг 1 июлидан бошлаб ташкилот қоидалари ва нормаларига мос келмайдиган норматив-ҳуқуқий ҳужжатлар лойиҳаларини ишлаб чиқиш тақиқланади.

Ўзбекистоннинг ЖСТга аъзо бўлиши билан боғлиқ тадбирларни амалга ошириш учун зарур маблағлар ҳам тасдиқланди. Жорий йилда бу борадаги ишлар учун 30 миллиард сўм маблағ йўналтирилади.

Муаллиф: Мадибек Джанибеков