Ўзбекистон келгуси йилда 7 миллионга яқин хорижий сайёҳни жалб қилишни режалаштирмоқда

TASHKENT. Kazinform - Ўзбекистон президенти Шавкат Мирзиёев мамлакат туризм индустриясини ривожлантириш масалаларига бағишланган йиғилишда 2023 йилда камида 7 миллион хорижий ва 12 миллион маҳаллий сайёҳни жалб этиш бўйича топшириқ берди, деб хабар бермоқда Kazinform мухбири ЎР президенти матбуот хизматига таяниб.

«Бу йил туризм пандемиядан кейин қайта тикланяпти. Сентябргача юртимизга келган хорижий туристлар сони 2021 йилга нисбатан 3 бараварга кўпайди. Йил бошидан буён туризм экспорти ҳажми 926 миллион доллар бўлди. Юртимизга келган меҳмонларнинг саёҳати ўртача 4-5 кунгача, сарфлаган маблағи 305 долларгача кўпайди», — деди президент.

Ўзбекистон раҳбари Самарқанд шаҳрида ташкил этилган, йилига 2 миллион сайёҳга хизмат кўрсатишга қодир «Буюк ипак йўли» халқаро сайёҳлик маркази юксак салоҳиятга эга эканини таъкидлади. Фарғона вилоятида 5 туман ва 3 шаҳарни қамраб олган «Олтин водий сайёҳлик ҳалқа»сини яратиш лойиҳаси ижобий баҳоланди. Сафари туризми ва зиёрат туризмини ривожлантириш имкониятлари ҳам қайд этилди.

«Мамлакатимизда 1 минг 200 дан зиёд зиёратгоҳ бор. Йиғилишда бу имкониятни тўлиқ ишга солиб, йилига камида 1 миллион сайёҳ жалб қилиш мумкин», — деди Шавкат Мирзиёев.

Президент ички ишлар органларида сайёҳларни рўйхатга олиш қоидаларини соддалаштириш масалаларига тўхталди. Ҳатто энг ривожланган давлатлар ҳам ҳар бир сайёҳ учун курашаётган муҳитда барча ҳаддан ташқари чекловлар қайта кўриб чиқилиши керак.

«Туристларни ички ишлар идораларида рўйхатга олиш тартибида ҳам ноқулайликлар бор. Хусусан, хориждан келган туристни меҳмонхона 2 кун ичида, қариндошиникида қолганда эса, уйнинг эгаси 3 кун ичида вақтинчалик рўйхатдан ўтказиши керак. Ички ишлар вазирлигига бу тизимни таҳлил қилиб, ортиқча чекловларни олиб ташлаш бўйича топшириқ берилди. Бунда хорижий туристларни вақтинчалик рўйхатга олиш ўрнига онлайн хабардор қилиш тартибига ўтилади», — деди Ўзбекистон президенти.

Шунингдек, билдиришнома тартибини жорий этган ҳолда турагентлар фаолиятини лицензиялаш талабини бекор қилиш режалаштирилган. Бу яна минглаб сайёҳлик агентликларининг пайдо бўлиши учун имконият яратади.

«Келгуси йилда 7 миллион хорижий ва 12 миллион маҳаллий туристларни жалб қилиш, туризм экспортини 2 миллиард долларга етказиш имконияти мавжуд», – деди Шавкат Мирзиёев.

Муаллиф: Мадибек Жанибеков

Фото: president.uz