Юзлаб хорижий фуқаролар Судандан эвакуация қилинди

ASTANA. Кazinform - Суданда армия ва махсус кучлар томонидан эълон қилинган сулҳ режими фонида чет эл фуқаролари эвакуация қилинмоқда. Саудия Арабистони томонидан репатриация қилинган 157 киши мамлакатни биринчи бўлиб тарк этди, дея хабар беради Кazinform Euronewsга таяниб.

АҚШ ҳарбийлари АҚШ дипломатлари ва уларнинг оилаларини Хартумдан вертолётда эвакуация қилди. Британия, Франция ва Хитой эвакуация қилишда ҳарбий транспорт самолётларидан фойдаланади.

Ўтган жума куни C-130 ҳарбий транспорт самолёти Япониядаги Комаки ҳаво базасидан Япония фуқароларини Судандан эвакуация қилишга тайёргарлик кўриш учун Жибути томон учди.

Суданда армия ва Тезкор ҳаракат кучлари ўртасидаги можаро иккинчи ҳафтадан бери давом этмоқда. Пойтахт марказида тўқнашувлар тўхтамаяпти.

Тўқнашувлар давомида камида 413 киши ҳалок бўлган, 3,5 мингдан ортиқ киши жароҳатланган.

Ҳарбий штаб ва президент саройи каби қатор объектлар турар-жой биноларига яқин бўлгани учун Хартум аҳолиси уруш зонасида яшайди.

Кўплаб оилалар электр ва сувсиз қолди. Хартум аҳолиси фақат озиқ-овқат ва сув захираларини тўлдириш ёки шаҳарни тарк этиш учун кўчага чиқади.

Аввалроқ Судан фуқаро авиацияси бошқармаси мамлакат ҳаво ҳудудини 30 апрелга қадар ёпишни буюрган эди.

Бир қатор дунё етакчилари Судандаги можарода қатнашаётган томонларни жума куни бошланган Рамазон ҳайити муносабати билан сулҳга риоя қилишга чақирди. Бирлашган Миллатлар Ташкилоти Бош котиби Антониу Гутерриш ҳам тинч аҳолининг хавфсиз манзилга етиб боришига имкон беришга чақирди.