«Юрак тафти» акцияси: Президент Астана турғунининг тилагини бажарди

ASTANA. Каzinform – Астана шаҳри ҳокими Женис Қасимбек «Юрак тафти»(Жүрек жылуы) хайрия акцияси доирасида Давлат раҳбари номидан шаҳар турғунига совға топширди. Бу ҳақда Kazinform шаҳар ҳокимлигига таяниб хабар беради.

21 март куни Президент Қасим-Жомарт Тоқаев «Юрак тафти» акциясини бошлаб, одамларнинг тилак ва орзулари ёзилган қутидан мактублардан бирини олди. Давлат раҳбари мактубни ўқиб чиқди ва унинг эгасининг тилаклари амалга ошишини айтди.

Мурожаатда Астана турғуни тонометр сўраган. Бугун пойтахт ҳокими Женис Қасимбек Гулжахан Сидиқова билан учрашиб, Давлат раҳбари номидан тонометрни топширди. Шунингдек, унга моддий ёрдам берилади ва санаторийга юборилади. Гулжахан Сидиқова Президентга ва «Юрак тафти» хайрия акцияси иштирокчиларига миннатдорлик билдирди.

Эслатиб ўтамиз, мамлакатда «Юрак тафти» хайрия акцияси бўлиб ўтмоқда. Унинг доирасида волонтёрлар ва фаол фуқаролар аҳолининг ижтимоий заиф қатламлари: кўп болали оилалар, алоҳида эҳтиёжли фуқаролар, нафақахўрлар ва бошқа аҳолига уларнинг талаб ва истакларини бажаришда ёрдам бермоқда.