Японияда коронавирус вакцинаси клиник синовдан ўтказилмоқда

TOKYO. Kazinform – Япониялик олимлар коронавирус вакцинасининг клиник синовини ўтказмоқда, деб хабар бермоқда Kazinform Япониянинг NHK телеканалига таяниб.

Осака префектурасининг соғлиқни сақлаш идоралари маҳаллий университетлар билан биргаликда COVID-19 вирусига қарши вакцинани ишлаб чиқмоқдалар. Намуна синовлари ҳайвонларда ўтказилди.

Осака губернатори Йошимура Хирофумининг сўзларига кўра, клиник синовнинг биринчи босқичида 20-30 нафар тиббиёт ходимлари эмланади. Префектура раҳбарининг сўзларига кўра, антивирус препаратлари ва вакциналарни ишлаб чиқиш жуда муҳимдир. Осака ушбу мақсад сари биринчи қадамни ташламоқда.

Вакцина хавфсиз деб топилса, Осака префектураси ҳукумати октябрь ойида яна юзлаб одамларни синовдан ўтказишни режалаштирмоқда.

Агар вакцина муваффақиятли бўлса, Япония 2020 йил охирига қадар 200 000 дозани ишлаб чиқаришни ва келаси йил регуляторлардан розилик олишни режалаштирмоқда.

Бугунги кунга қадар Японияда 17 600дан ортиқ кишига коронавирус ташхиси қўйилган ва эпидемия натижасида вафот этганлар сони 930 кишидан ошган.