Туркиянинг 10 та провинциясида 3 ой муддатга фавқулодда ҳолат жорий этилди

ASTANА. Кazinform – Туркия Президенти Режеп Таййип Эрдоған вайронагарчиликка учраган зилзиладан жабр кўрган 10 та провинцияда 3 ой муддатга фавқулодда ҳолат жорий этилишини эълон қилди, дея хабар беради Kazinform Аnadoly агентлигига таяниб.

Туркия раҳбарининг таъкидлашича, сўнгги маълумотларга кўра, Туркияда зилзила қурбонлари сони 3549 киши бўлган, 22168 киши жароҳат олган. Вайроналар остидан саккиз мингдан ортиқ одам қутқариб олинди.

«Биз нафақат Туркия, балки бутун минтақа ва дунё тарихидаги энг катта офатлардан бирига дуч келдик. Табиий офат содир бўлган ҳудудда ишлаш учун барча давлат тузилмалари, ходимлар ва техника сафарбар қилинди. Биринчи босқичда табиий офат ҳудуди аҳолисига шошилинч ёрдам кўрсатиш учун 100 миллиард лира ажратилди», — деди Р. Эрдоған.

Зилзила зонасига 54 минг чодир, 102 минг каравот, асосий эҳтиёжлар, мингга яқин тез тиббий ёрдам вагонлари, иккита тиббий самолёт жўнатилди. 5 минг тиббиёт ходими ўнта провинция аҳолисига ёрдам бермоқда.

Эрдўғоннинг сўзларига кўра, воқеа содир бўлган ҳудудга 53 317 нафар қутқарувчи сафарбар қилинган. Туркия ва бошқа мамлакатлардан келган жамоалар туфайли уларнинг сони кундан кунга ортиб бормоқда. Шунингдек, Туркия Президенти ҳалокатли зилзила оқибатларини бартараф этишда ҳамкорликка чақирди.

«Биз ёлғон маълумотлар ва фейк орқали жамиятда низо тарқатишга уринишларни кўряпмиз. Ҳамма нарсага вақти келганда жавоб оламиз», - деди Р. Эрдоған.

Шу билан бирга, Президент Туркия ҳукумати қошидаги Фавқулодда вазиятларнинг олдини олиш ва ёрдам агентлиги (АFAD) банк ҳисоб рақамларига турк лираси ва хорижий валютадаги маблағларни ўтказиш комиссияси олиб ташланганини маълум қилди.

Эслатиб ўтамиз, Туркиянинг жануби-шарқидаги Газиантеп провинциясида 6,4-6,6, кейин эса 7,4 магнитудали кучли зилзила содир бўлди.

Фото: aa.com.tr