Туркия парламентида энг кўп ўрин ҳукмрон партия альянсига тегди

ASTANA. Kazinform – Туркияда ҳукмрон Адолат ва тараққиёт партияси раҳбарлигидаги «Республикачилар альянси» мамлакат парламентида кўпчилик овозга эга бўлди, деб баёнот берди Туркия Олий сайлов комиссияси раҳбари Ахмет Йенер.

«Парламентда Адолат ва тараққиёт партияси 268 та ўрин, Миллий ҳаракат партияси 50 та ўрин, Yeniden Rifah партияси бешта ўринни қўлга киритди», – дея келтиради унинг сўзларини Anadolu агентлиги.

Шундай қилиб, парламентдаги мавжуд 600 та ўриннинг 323 таси «Республикачилар альянси»га тегди.

Президент сайловида мағлуб бўлган номзод Камол Қиличдорўғли раҳбарлик қилувчи мухолифатдаги Халқ-республикачилар партияси парламентда 169 ўрин билан кифояланади, унинг иттифоқчиси бўлган «Яхши партия» эса 43 та ўрин олган. Қолган ўринлар Сўл яшиллар партияси ҳамда Туркия ишчилари коммунистик партиясига насиб қилган.