Туркистонда Ҳиндистон университетининг филиали очилади
Бугун Туркистон вилояти ҳокими Дархан Сатибалди Penn state (Пенсильвания) университетининг магистратура ва халқаро дастурлар декани Стивен Барнсни қабул қилди. Учрашувда университет филиалини очиш ташаббуси учун зарур шарт-шароитлар муҳокама қилинди, ҳамкорликни мустаҳкамлаш йўллари кўриб чиқилди.
«Ҳозирги давр рақамлаштириш даври эканини инобатга олиб, вилоят ёшлари учун IТ йўналиши бўйича олий таълим муассасасини очиш зарурати пайдо бўлди. Шу боис Туркистонда IТ университетининг филиалини очиш масаласини кўриб чиқишни тавсия қиламан. Ушбу лойиҳа доирасида вилоят ҳокимлиги томонидан барча кўмак кўрсатилади, шуни маълум қиламанки, биз тегишли инфратузилмани тақдим этишга тайёрмиз. Резидентларимиз учун замонавий таълим муассасаси очишимиз, уларнинг ҳар томонлама ривожланиши учун шароит яратишимиз керак», — деди Дархан Сатибалди.
Стивен Барнс Туркистоннинг тарихий ўрни ҳақида гапириб, шаҳар равнақи ва вилоят раҳбари томонидан кўрсатилаётган ҳурмат-эҳтиром учун ўз миннатдорчилигини билдирди.
«Мен Пенсилвания университетида ишлайман. Ҳиндистондаги Миллий суд экспертизаси университети билан яқин алоқадаман ва унинг асосчилари билан ҳамкорликда ишлайман. Туркистонга келишдан мақсадим Ҳиндистоннинг етакчи таълим муассасаларидан бирининг филиалини очишга ёрдам беришдир. Йўл ва бинолар қуриш осон, лекин билимли авлодни вояга етказиш, сифатли таълим тизимини ривожлантириш жуда қийин иш. Кўраманки, қисқа вақт ичида таълим муассасасининг Туркистонда филиалини очиш имконияти бор. Агар махсус бино ажратилса, университет ўз филиалини очишга, мутахассисларни вақтинча юборишга ва қозоғистонлик ўқитувчиларнинг малакасини оширишга тайёр», — деди Стивен Барнс.
Вилоят ҳокими Дархан Сатибалди учрашув давомида билдирилган таклиф ва шарт-шароитлар тўлиқ таҳлил қилиниб, тегишли ишлар олиб борилиши, халқаро талабларга мос таълим муассасаси очишга кўмак кўрсатилишини айтди.
Қозоғистон Республикаси Фан ва олий таълим вазирлиги лойиҳа раҳбари Самғат Ермекбаев ушбу ташаббуснинг муҳимлигини таъкидлаб, самарали ҳамкорлик йўлга қўйилишига ишонч билдирди. Музокараларни давом эттириш мақсадида июнь ойида университет вакиллари Қозоғистонга ташриф буюриши режалаштирилган.
Эслатиб ўтамиз, Миллий суд экспертизаси университети (National Forensic Sciences University) Ҳиндистондаги киберхавфсизлик, рақамли криминалистика ва суд экспертизаси йўналишлари бўйича дунёдаги етакчи таълим муассасаларидан бири ҳисобланади. Таълим муассасасида суд экспертизаси ва криминалистика соҳасидаги 14 та факультетда 75 та мутахассислик, жумладан киберхавфсизлик, рақамли криминалистика йўналишида таълим берилади.
Муаллиф: Қайрат Зайнишев