Тоқаев Яссавий мақбарасини зиёрат қилган ЮНЕСКО Бош директорига миннатдорчилик билдирди
Учрашувда Қозоғистон ва ЮНЕСКО ўртасидаги маданий-тарихий меросни асраб-авайлаш, таълим ва фан соҳасида халқаро алоқаларни кенгайтириш соҳасидаги ҳамкорликнинг долзарб масалалари муҳокама этилди.
Президент Қасим-Жомарт Тоқаев Одрэ Азулега ҳурмат билан унинг ЮНЕСКО Бош директори сифатидаги раҳбарлигини юксак қадрлашини ва ташкилотни янада мустаҳкамлашга қаратилган фаолиятини қўллаб-қувватлашини таъкидлади.
Президент Хожа Аҳмад Яссавий мақбарасини зиёрат қилгани учун бош директорга миннатдорлик билдирди. Шунингдек, унинг Туркистонга ташрифи фуқаролар томонидан ижобий қабул қилингани ва оммавий ахборот воситаларида кенг эълон қилинганини айтди.
«Сизнинг ташрифингиз Қозоғистон ва ЮНЕСКО ўртасидаги ўзаро манфаатли ҳамкорликни янада ривожлантириш учун жуда муҳим. ЮНЕСКО биз учун алоҳида ташкилот ва устувор вазифа. Биз бу ўзаро муносабатларни янада ривожлантириш учун бор куч-ғайратимизни ишга соламиз», – деди ҚР Президенти.
Давлат раҳбари Қозоғистон иқлим, биологик хилма-хиллик ва сув ресурслари соҳаларида қўшма лойиҳаларни амалга ошириш ниятида эканини маълум қилди. Тез орада Минтақавий кўп тармоқли идорага айлантириладиган Алмати шаҳридаги ЮНЕСКО Бюросининг фаолияти Қозоғистоннинг ушбу ташкилот билан муваффақиятли муносабатларига ёрқин мисолдир.
