Теннис бўйича жаҳон чемпионати: Қозоғистон ўсмирлари илк бор чорак финалга чиқишди

NUR-SULTAN. Кazinform – Қозоғистон ўсмирлар терма жамоаси Простеев шаҳрида (Чехия) ўтказилаётган 14 ёшгача бўлган ўсмирлар ўртасида жамоавий жаҳон чемпионатининг (2022 ITF World Junior Tennis Finals) чорак финалига чиқди, деб хабар беради Кazinform мухбири.

Қозоғистон теннис федерацияси хабар беришича, мусобақанинг учинчи куни қозоғистонлик ёшлар жаҳон чемпиони – Италияни мағлуб этишди.

Кеча Аргентина терма жамоаси билан муваффақиятли ўйнаган Даниэль Тазабеков кортга биринчи бўлиб чиқди ва Сальваторе Тартальоне билан куч синашди. Биринчи партияда Даниэль рақибига бирорта ҳам гейм бермади - 6:0. Иккинчи сетда эса бешинчи геймда брейк қилди ва ўз устунлигини қўлдан бой бермади – 6:3.

Занғар Нурланули ва Антонио Марильяно ўртасида жуда қийин рақобат бўлди. Биринчи партияда италиялик спортчи устунлик қилганди – 6:4. Иккинчисида эса 3:1 ҳисобида олдинга чиқди. Бироқ Занғар ҳисобни тенглаштирибгина қолмай, сетни ўз фойдасига ҳал қилди – 6:4. Учинчи, ҳал қилувчи ўйиннинг саккизинчи геймида қозоғистонлик теннисчи брейк қилишга муваффақ бўлди – 5:3. Кейин эса ўзи узатмани амалга оширганида ўйинни якунлашга муваффақ бўлди - 6:3.

Шу тариқа жаҳон чемпионларини мағңлубиятга учратган Қозоғистон ўсмирлар терма жамоаси ўз тарихида илк бор жаҳон чемпионатининг чорак финалига қадар етиб бориб, кучли саккизта жамоа қаторидан жой олди.

Эслатиб ўтамиз, аввалроқ теннис бўйича жаҳон чемпионатида қозоғистонлик ўсмирлар Аргентинани мағлуб этгани ҳақида хабар берган эдик.

Фото: ktf.kz

Муаллиф: Ғайсағали Сейтақ