Тараздаги ҳунармандлар кўргазмасида дунёнинг 10 та давлатидан 200 нафар ҳунарманд ўз асарларини тақдим этади
Жаҳон рўйхатида ҳозирда 55 та ҳунарманд шаҳар бор ва Тараз бу рўйхатга Қозоғистоннинг биринчи шаҳри бўлди.
Тараз икки минг йиллик тарихга эга, бу даврда ҳунармандчилик фаол ривожланди. Буюк Ипак йўлидаги шаҳар ўрта асрларда ранг-баранг кулолчилик, заргарлик буюмлари, шойи, кигиз, металл буюмлар ишлаб чиқарадиган моҳир ҳунармандлари билан машҳур бўлган.
Таразда «Қадимий Тараз» тарихий-меъморий мажмуаси пайдо бўлиши билан шаҳар ҳокимлиги «Ҳунармандлар шаҳри»ни яратишни режалаштирмоқда, унда ташриф буюрувчилар ва сайёҳлар декоратив-амалий санъат, сувенирлар яратиш жараёнининг ўзини кўришлари мумкин эди. Шунингдек, бир пайтлар Таразда ривож топган унутилиб кетган ҳунармандчиликни қайта тиклаш режалаштирилган. Бу кигиз буюмлари, ипак, шекпен, кулолчилик ишлаб чиқаришдир.
«Бу йил Тараз Жаҳон ҳунармандчилик шаҳарлари рўйхатига кириш учун ариза берди», - деди Жамбил вилояти ҳокимининг биринчи ўринбосари Нуржан Календеров Кazinform мухбири билан суҳбатда. – Июл ойида вилоят марказига 12 нафар халқаро эксперт ташриф буюриб, улар учун ҳунармандларимиз маҳсулотлари кўргазмаси ташкил этилди. Бундан ташқари, мутахассислар томонидан Жамбил вилоятининг туризм салоҳияти ўрганилди. Халқаро экспертлар Жамбил вилоятининг тарихий диққатга сазовор жойлари, шунингдек, ҳудуддаги ҳунармандчилик ишлаб чиқариш шароитларини юқори баҳолаб, биз сақлаб қолган диққатга сазовор жойларни дунёга кўрсатиш керак, хорижлик сайёҳлар учун қизиқарли бўлади, деган хулосага келди».
Сентябр ойи охирида Тараз жаҳон ҳунармандчилик шаҳарлари рўйхатига киритилгани маълум бўлди, деди маърузачи.
1 октябр куни «Қадимий Тараз» тарихий-этник-маданий мажмуаси майдонида «Тараз – ҳунармандлар шаҳри» Халқаро ҳунармандлар кўргазмаси очилади. Ташкилотчи – Жамбил вилояти ҳокимлигининг туризм бошқармаси.
Кўргазма дастуридан Тараз шаҳрини Жаҳон ҳунармандчилик шаҳарлари рўйхатига киритиш бўйича эксперт комиссияси хулосасини эълон қилиш ва ҳамкорлик меморандумларини имзолаш ўрин олган.
Кўргазма доирасида Жамбил вилояти ҳамда Россия, Татаристон, Бразилия, Нидерландия, Ҳиндистон, Озарбайжон, Ўзбекистон, Қирғизистон, Тожикистон каби мамлакатлардан келган икки юз нафар ҳунарманднинг эсдалик совғалари ярмаркаси ва савдоси бўлиб ўтади. Мутахассислар ўз ҳунармандчилик маҳоратини намойиш этадиган маҳорат сабоқлари ташкил этилади, «Тараз шаҳрида маданий меросни тиклаш ва оммалаштиришнинг замонавий тенденциялари ҳамда ҳунармандчиликни ривожлантиришни рағбатлантириш» мавзусида давра суҳбати ўтказилади.
Кўргазма меҳмонлари ва шаҳар аҳолисини бой маданий дастур - концертлар, танловлар, экскурциялар кутмоқда.
«Тараз – ҳунармандлар шаҳри» халқаро ҳунармандлар кўргазмасига Жаҳон ҳунармандлар кенгаши эксперт комиссияси вакиллари, Қозоғистон ва хорижий мамлакатлар ҳунармандлар уюшмалари президентлари вакилларидан иборат нуфузли меҳмонлар ташриф буюришади.
Таразда 78 та ҳунарманд рўйхатга олинган бўлиб, уларнинг учдан бир қисми кигиз маҳсулотлари ишлаб чиқариш билан шуғулланади. Тараз шаҳрининг Жаҳон ҳунармандчилик шаҳарлари рўйхатига киритилгани жамбиллик усталарга ўз ижодий салоҳиятини рўёбга чиқариш, бошқа шаҳар ва давлатлар билан ҳамкорликни кенгайтириш имконини беради. Улар учун бу жаҳон ҳунармандлар тармоғида намоён бўлиш, кўплаб мамлакатлардаги ҳамкасблари билан ягона платформада мулоқот қилиш имкониятидир.
Тараз шаҳри учун эса Жаҳон ҳунармандчилик шаҳарлари рўйхатига киришдан кўзланган асосий мақсад сайёҳларни жалб этиш, унинг бой туризм салоҳиятини оммалаштиришдан иборат.
«Тараз – ҳунармандлар шаҳри» халқаро ҳунармандлар кўргазмаси 4 октябрга қадар давом этади.
Муаллиф: Галина Скрипник