Таразда халқаро ҳунармандчилик кўргазмаси бўлиб ўтяпти
Уч кун давом этадиган кенг кўламли тадбирда Осиё-Тинч океани, Марказий Осиё, Европа, яқин хорижий давлатлар ва Қозоғистондан 250 нафар ҳунарманд иштирок этяпти. Шу муносабат билан халқаро ҳунармандлар уюшмалари, халқаро экспертлар, туризм соҳасидаги давлат ва нодавлат ташкилотлар вакиллари минтақага алоҳида эътибор қаратган.
Кўргазманинг очилиши «Кўне Тараз» тарихий-этномаданий мажмуасида бўлиб ўтди. Унда «Галерея», «Кўргазмалар зали» ҳамда мажмуа ўрнида махсус ўрнатилган чодирлар, кигиз уйларда ҳунармандчилик буюмлари оммага намойиш этилди.
Кўргазма давомида эсдалик совғалари савдоси ярмаркаси, маҳорат сабоқлари, ёш рассом ва ҳунармандлар кўрик-танловлари, шунингдек, Тараз шаҳрининг тарихий жойлари ва диққатга сазовор жойлари бўйича ахборот саёҳатлари ташкил этилади. Вилоятнинг туристик қиёфасини юксалтириш, маҳаллий ҳунармандларни халқаро миқёсда танитиш, яқин ва узоқ хорижлик санъат усталари ўртасида тажриба алмашиш мақсадида ташкил этилган кенг кўламли тадбир уч кун давом этади.
Эслатиб ўтамиз, ўтган йили 2000 йилдан ортиқ тарихга эга бўлган Тараз шаҳрига «Жаҳон ҳунармандлар шаҳри» номи берилган эди. Дунёнинг ҳунарманд шаҳарлари рўйхати 2014 йилда тузилган. Тараз бу рўйхатга киритилган Қозоғистоннинг биринчи шаҳри бўлди.
Бугунги кунда вилоятда 3500 га яқин тарихий ва маданий ёдгорликлар мавжуд. Улардан 5 таси ЮНЕСКОнинг Жаҳон маданий мероси рўйхатига киритилган. Тараз шаҳрида 80 га яқин ҳунарманд бор. Уларнинг 30 фоизи кигиз маҳсулотлари ишлаб чиқаради.
Муаллиф: Эльвира Жарилқасинова