Суперпрезидентлик бошқарув шаклидан бутунлай воз кечамиз – ҚР Президенти
26 Апрель 23:30

Суперпрезидентлик бошқарув шаклидан бутунлай воз кечамиз – ҚР Президенти

NUR-SULTAN. Kazinform – Президент Қасим-Жомарт Тоқаев Amanat партиясининг навбатдан ташқари XXIII қурултойида иштирок этди, дея хабар бермоқда Kazinform Ақорда расмий сайтига таяниб.

Қасим-Жомарт Тоқаев қурултой делегатларига давлат ва жамиятни тубдан модернизация қилиш жараёни бошланганини айтди. Президентнинг таъкидлашича, Amanat ушбу тизимли ўзгаришларда фаол иштирок этмоқда. Шунингдек, ислоҳотларни ҳар томонлама қўллаб-қувватлаган ҳолда «Халқ овозини эшитадиган давлат» концепциясини самарали ҳаётга татбиқ этишда партиянинг ҳиссаси борлигини таъкидлади.

«Amanat ижтимоий адолат тамойилини қарор топтиришга доимо алоҳида эътибор қаратади. Давлатчиликни мустаҳкамлаш ва мамлакат бирлигини мустаҳкамлаш ташкилотнинг махсус вазифаларидан биридир. Охирги қурултойда партияга ребрендинг қилинди. Унинг институционал модернизацияси бўйича ҳам ишлар бошланди. Партия дарҳол бу вазифаларни бажаришга киришди. Ҳақиқий натижа бор, биз аллақачон ўзгаришларни кўрмоқдамиз. Ишни секинлаштирмасдан давом эттириш керак», – деди Президент.



Президент март ойи ўрталарида Қозоғистон халқига Мурожаатномасида сиёсий ислоҳотларнинг кенг қамровли дастурини таклиф қилганини эслатди. Шунингдек, у Конституцияга киритиладиган ўзгартиш ва қўшимчалар лойиҳаларини тайёрлаш бўйича кенг кўламли ишлар бошланганини, уларсиз режалаштирилган сиёсий ислоҳотларни самарали амалга ошириш мумкин эмаслигини таъкидлади.

«Конституциявий ислоҳотдан кўзланган мақсад мамлакатни янада ҳар томонлама сиёсий модернизация қилиш учун мустаҳкам замин яратишдан иборат. Ўтган ҳафтада Конституциявий кенгашга ўзгартириш лойиҳаси юборилган эди. Унинг қабул қилиниши давлат институтларини яратиш ва фаолиятининг мутлақо янги моделини – Янги Қозоғистонни яратиш имконини беради. Фуқаролар кўпинча «Янги Қозоғистон нима ўзи у, деб сўрашади. Менимча, бу саволга қисқача жавоб бор. Янги Қозоғистон, бу аслида Адолатли Қозоғистондир. Фуқароларга нисбатан ижтимоий адолат етишмаслигини тан олайлик. Оддий халқ манфаати ҳар доим ҳам инобатга олинмайди, ҳатто баъзида давлат амалдорлари томонидан адолатсизлик ҳам содир этилади. Фуқароларнинг давлат органларига ишончсизлиги шундан келиб чиқади. Бинобарин, Amanat партияси олдида ана шу камчиликларни тўлдириш вазифаси турибди. Фуқаролик жамияти ва ҳукумат ўртасида бўғин бўлиш учун халқ билан яқиндан ҳамкорлик қилиш керак», – деди Қасим-Жомарт Тоқаев.



Шунингдек, у Конституцияга киритилаётган ўзгартиш ва қўшимчалар мамлакатнинг бутун сиёсий архитектурасини ҳар томонлама қайта кўриб чиқиш, ҳокимият тармоқлари ўртасида ўзаро тийиб туриш ва мувозанатни сақлашнинг янада мутаносиб тизимини яратишга қаратилганини таъкидлади. Президент таъкидлаганидек, супер-президентлик бошқаруви шаклидан тубдан воз кечилиб, парламент ва маслихатларнинг ваколатларини кучайтирилади. Партия-сиёсий тизимни модернизация қилиш устувор вазифалардан биридир.

Давлат раҳбари партия ва сайлов қонунчилигини либераллаштириш жамиятнинг ролини кучайтиришини таъкидлади. Бу ҳукуматнинг барча даражаларида қабул қилинган қарорларга тааллуқлидир. Президентнинг фикрича, фуқароларнинг овози учун рақобат кучайиб, сиёсий жараёнларнинг суръати ва мазмуни ўзгаради.

«Умуман олганда, партия майдонида шов-шув кўряпмиз. Adal партиясининг Amanat партияси билан бирлашиш ташаббуси бошланган ўзгаришларнинг ёрқин ифодасидир. Adal партияси етакчилари ва аъзоларига ушбу муҳим қарорлар учун миннатдорчилик билдираман. Агар биз янги Қозоғистонни қурмоқчи бўлсак, мамлакатга хайрихоҳ барча ижтимоий-сиёсий кучларни сафарбар қилиш керак. Шу билан бирга, томонларнинг келишувга эришиши, сиёсий тизимни ривожлантириши муҳим. Шундай экан, Adal партияси ташаббусини қўллаб-қувватлаб, у билан бирлашишимиз керак, деб ўйлайман. Adal – ўз тарафдорлари билан ташкил этилган партия. Бу, айниқса, сиёсий рақобат кучайиб бораётган бир пайтда жуда муҳим», – деди Қасим-Жомарт Тоқаев.



Йиғилишда Давлат раҳбари биз маъсулиятли ва ўта муҳим босқичга қадам қўйганимизни таъкидлади. Президент таъкидлаганидек, конституциявий ислоҳотлар мустақиллик тарихидаги янги босқичдир. Буларнинг барчаси замон ва жамият талабидан келиб чиқади.

«Аввалроқ партия раислигидан воз кечишимни ва ташкилотдан кетишимни айтгандим. Бу қарорни амалга ошириш вақти келди. Бугундан бошлаб Amanat партияси раислигидан воз кечишга ва партиядан кетишга қарор қилдим. Бу қадам рамзий маънога эга. Шу муносабат билан Президент сайловида билдирган ишонч ва қўллаб-қувватлаганингиз учун барчангизга миннатдорчилик билдираман. Шунингдек, ҳал қилувчи паллада партия раҳбариятини ишониб топширганингиз учун миннатдорчилик билдираман. Биз биргаликда кўп ишларни қилдик. Бироқ, вақт бир жойда турмайди. Ҳозир кўп нарса ўзгармоқда. Бизнинг олдимизда катта вазифалар турибди. Бугунги кунда мамлакатдаги барча саноат тармоқларининг монополиясидан қутулиш жуда муҳим. Сиёсий тизим ҳам бу жараёндан четда қолмаслиги керак. Давлат раҳбари ҳеч бир партияга устувор аҳамият бермаслиги, яъни сиёсий жиҳатдан бетараф бўлиши керак. Бу менинг аниқ позициям», – деди Қасим-Жомарт Тоқаев.

Президентнинг фикрича, бундай қоида сайловда иштирок этувчи барча кучлар учун тенг имкониятлар яратади. Бу сиёсий тизимда адолатга йўл очади. Партия ижро ҳокимиятига қарам бўлмаса, халқнинг унга бўлган ишончини мустаҳкамлайди, нуфузини оширади.



«Эндиликда мазкур ташкилотнинг парламент ва маслихатларда сезиларли устунлиги бор. Шунинг учун у Ҳукумат ва ҳокимликлар ишини қаттиқ назорат қилиши мумкин. Президент партиядан кетган бўлса-да, ташкилотнинг стратегик йўналиши ўзгаради, деб ўйламайман. Amanat мамлакат сиёсий ҳаётида алоҳида ўринга эга бўлган ташкилот бўлиб қолиши аниқ. Сиёсатда узвийлик сақланиб қолади ва партия мамлакат манфаати учун ишлашда давом этади», – деди Президент.



Қасим-Жомарт Тоқаев партия раислигига парламент мажлиси раиси Ерлан Қошанов номзодини кўрсатиб, уни юксак ташкилотчи, тажрибали ва малакали фуқаро сифатида баҳолади.

Қурултой делегатлари Президент таклифини бир овоздан қўллаб-қувватладилар ва Ерлан Қошанов номзоди учун овоз бердилар.

Давлат раҳбари бугунги ўзгаришлар Amanat партиясини модернизация қилиш имконини беришига ишонч билдирди.




Янгиликлар

Архив