Судандаги қуролли тўқнашувларда ҳалок бўлганлар сони 56 нафарга етди
Мамлакат тиббиёт қўмитаси маълумотларига кўра, биргина Хартумнинг ўзида 17 киши ҳалок бўлган, 302 киши жароҳатланган.
Аввалроқ шифокорлар 25 киши ҳалок бўлгани, 183 киши жароҳатлангани ҳақида хабар берган эди.
Суверен кенгашига (мамлакат бошқарув органи) раҳбарлик қилаётган армия қўмондони Абдул Фаттоҳ ал-Бурҳон ва унинг кенгашдаги ўринбосари - махсус кучлар қўмондони Муҳаммад Ҳамдан Дагало (Ҳамидти) ўртасидаги келишмовчиликлар туфайли Судандаги вазият ёмонлашди. 15 апрель куни эрталаб Меров ва Хартумдаги ҳарбий база яқинида бу икки тузилма ўртасида тўқнашувлар бошланган.
БМТ Хавфсизлик Кенгаши ўт очишни тўхтатишга чақирди.
«Хавфсизлик Кенгаши аъзолари томонларни зудлик билан ҳарбий ҳаракатларни тўхтатишга, осойишталикни тиклашга ва Судандаги мавжуд инқирозни ҳал қилиш учун мулоқотга қайтишга чақирди», — дейилади БМТ Хавфсизлик кенгашининг шанба кунги баёнотида.
Бундан ташқари, БМТ Хавфсизлик Кенгаши аъзолари гуманитар ёрдамнинг минтақага етиб бориши муҳимлигини таъкидлаб, Суданнинг бирлиги, суверенитети ва ҳудудий яхлитлигини қўллаб-қувватлашларини тасдиқладилар.
Фото: AP Photo/ Marwan Ali