SpaceX 22 та янги авлод Starlink сунъий йўлдошларини учирди

NEW-YORK. Kazinform - Американинг SpaceX компанияси якшанба куни Starlink тармоғининг янги авлоди - 22 та микро сунъий йўлдошига эга Falcon-9 ракета ташувчисини учирди, дея хабар беради Kazinform ТАССга таяниб.

Эфир компания сайтида олиб борилди.

Ракета Канавералдаги (Флорида штати) космодромдан маҳаллий вақт билан 08:20 (Москва вақти билан 15:20) да учирилди. Falcon-9 нинг биринчи босқичи аввалги иккита учиришда ишлатилган. Учиришдан тахминан тўққиз дақиқа ўтгач, у автоматик равишда Атлантика океанида жойлашган сузувчи платформага қўнди. Ракета поғоналарини қайта-қайта ишлатиш Илон Маск бошчилигидаги компанияга транспорт воситаларини орбитага чиқариш харажатларини камайтириш имконини беради.

Компания сайтида қайд этилганидек, бу сафар орбитага 22 та янги авлод Starlink сунъий йўлдоши чиқарилади. SpaceX маълумотларига кўра, иккинчи авлод микро сунъий йўлдошлари кенгроқ частота диапазонида ишлайди ва интернетнинг юқори тезлигини таъминлайди.

Starlink тармоғи 5G стандартига мос келадиган 1 Гбит/с трафик тезлиги билан дунёнинг исталган нуқтасидан Интернетга киришни таъминлаш учун мўлжалланган. Компания орбитага 4500 дан ортиқ микро сунъий йўлдошларни етказган. 4100 га яқин сунъий йўлдошлар иш ҳолатида, қолганлари техник сабабларга кўра ишдан чиққан ёки орбитадан чиқиб кетган. SpaceX ҳисоб-китобларига кўра, жами 11 мингта сунъий йўлдошни учириш ва уларни ишга тушириш 10 миллиард долларга тушади.