Семейда Иккинчи жаҳон уруши қатнашчиларига 1,5 миллион тенгенинг сертификатлари топширилди

SEMEY. Кazinform - Ғалаба куни арафасида Шарқий Қозоғистон вилояти раҳбари Даниал Ахметов Семейга ташриф буюриб, уруш фахрийларини байрам билан табриклади, дея хабар беради Kazinform Semeynews.kzга таяниб.

Вилоятнинг биринчи ҳокими фронт орти фахрийси Рашида Ҳасановани табриклади. Рашида Ашрафовна 1932 йил 14 мартда туғилган. Саккизинчи синфни тугатгач, у кутубхоначи бўлиб ишлади. Икки йиллик ўқитувчилар институтини муваффақиятли тамомлагач, уни Жана-Семей туманининг Булоқ қишлоғига юборишди. Кейин у Педагогика институтининг физика-математика факультетига ўқишга кирди, сўнгра Турксиб мактабига ўқув бўлими мудири сифатида юборилди. Саккиз йиллик мактабда директор бўлиб ишлаган. Рашида Ашрафовна 1973 йилдан 1988 йилгача нафақага чиққунга қадар Ўқитувчилар малакасини ошириш институтини бошқарган.

«Ҳурмат белгиси» ордени, ВДНХ, «Меҳнат фахрийси», «Ерен еңбегі үшін» медаллари, вилоят ва шаҳар ҳокимининг фахрий ёрлиқлари билан тақдирланган, СССР ва ҚазССР халқ таълими аълочиси унвонига эга. Улуғ Ватан уруши фахрийси.

97 ёшли уруш фахрийси Матвей Юрченко вилоят раҳбарига ҳарбий фаолияти ҳақида гапириб берди.

Матвей Артемевич 1925 йил 20 августда туғилган. 1943 йил 8 мартда Красноярск ўлкаси Минусинск туман ҳарбий хизматга чақирилган. 1943-1945 йилларда 229-отқичлар полкида Иккинчи Украина фронти таркибида жангларда қатнашган. Ҳарбий хизматлари учун у иккинчи даражали «Ватан уруши» ордени, «Жасорати учун» ва «Германия устидан қозонилган ғалаба учун» медаллари билан тақдирланган.

Шарқий Қозоғистон вилояти ҳокими 96 ёшли фахрий Асқар Раҳимбаевни Ғалаба байрами билан табриклади.

1941 йилда Ақсуат туман ҳарбий комиссарлиги орқали Асқар Раҳимбаев армия сафига чақирилади. Шарқий фронтда 378-ҳарбий қисмнинг отқичлар полки таркибида жанг қилган. Руминияни фашистлар Германиясидан озод қилиш учун бўлган жангларда қатнашган.

Ҳарбий хизматлари учун у «Ватан уруши» ордени, «Германия устидан қозонилган ғалаба учун», «Жасоратли меҳнати учун», «Меҳнат фахрийси» медаллари билан тақдирланган. Асқар Раҳимбаевнинг катта оиласи – 10 фарзанд, 27 невара, 43 чевара ва икки эвараси бор.

Вилоят раҳбари фахрийларга ғалаба учун миннатдорчилик билдириб, уларга соғлик ва фаровонлик тилади, уларга бир ярим миллион тенге сертификат ва маиший техника совғаларини топширди.