Савдо вазири ЕОИИнинг Қозоғистондаги қимматчиликка таъсири ҳақида сўзлаб берди
23 Июнь 13:55

Савдо вазири ЕОИИнинг Қозоғистондаги қимматчиликка таъсири ҳақида сўзлаб берди

NUR-SULTAN. Kazinform – Қозоғистон Бош вазири ўринбосари – Савдо ва интеграция вазири Бақит Султанов Қозоғистонда инфляцияга таъсир этувчи Евроосиё иқтисодий иттифоқи доирасидаги тўсиқларни айтиб ўтди, деб хабар беради Kazinform мухбири.

«Савдо ҳамкорлиги даврида иқтисодий иттифоққа аъзо давлатлар бир-бирига дуч келадиган тўсиқлар ташкилот доирасидаги йиғилишларда энг кўп муҳокама қилинади. Евроосиё иқтисодий комиссияси, ҳукуматлараро йиғилишлар, президентлар иштирокидаги йиғилишлар ҳам худди шундай. Бугун биз кўпинча бир томонлама тўсиқларни кўрамиз. Техник, яъни тарифсиз тўсиқлар ҳам мавжуд. Масалан, агар Россия Федерациясининг маълум бир ҳудуди тўсиқ қўйса, биз уларни дарҳол олиб ташлашга ҳаракат қиламиз«, - деди вазир.

Вазирнинг сўзларига кўра, ўтган йилнинг ноябр ойида иттифоқ доирасида товар айланмаси 800 миллион долларни ташкил этган олтита тўсиқ олиб ташланган.

«Тўсиқларнинг кўп турлари мавжуд. Мисол учун, баъзи ҳокимлар жавонлардаги товарларга чекловлар қўйиши мумкин. Темир йўл маъмурияти томонидан чекловлар мавжуд. Чегарада қўшимча талаблар мавжуд. Буларнинг барчаси товарлар нархига таъсир қилади. Бироқ, уларнинг ҳар бирини тўсиқ сифатида тан олиш учун вақт керак. Буни текшириш ва Евроосиё иқтисодий комиссияси доирасида махсус тергов ташкил этиш керак», - деди Савдо вазири.

Унинг таъкидлашича, эндиликда ташкилотга аъзо барча давлатлар иттифоқ ичидаги тўсиқларни бартараф этишда иштирок этмоқда.

«Тўсиқларнинг тури кўп. Энг муҳими, уларни аниқлашдир. Қозоғистон, Беларусь, Қирғизистон, Арманистон ёки Россия ҳукуматлари томонидан чиқарилган қарорлар диққат билан кўриб чиқилиши керак. Агар аъзо давлатлар томонидан қабул қилинган қарорлар ўзаро савдони чекласа, буни тўсиқ сифатида кўриш мумкин», - деди Бақит Султанов.

Муаллиф: Есимжан Нақтибай

Янгиликлар

Архив