Сариағашта Ўзбекистон фуқароларини чегарадан ноқонуний ўтказиб келганлар ушланди

TURKISTAN. Kazinform - Туркистон вилояти полицияси ноқонуний миграцияда гумон қилинган фуқароларни ҳибсга олди. Сариағаш туманида уч нафар фуқаро Ўзбекистон фуқароларини чегарадан ноқонуний олиб ўтганлиги аниқланди, деб хабар беради Kazinform мухбири.

Вилоят ички ишлар бошқармаси матбуот хизматининг хабар беришича, уюшган жиноий гуруҳ аъзолари пухта режа қилишган. Улардан бири чегарадан ноқонуний ўтмоқчи бўлган одамларни излаб топган, иккинчиси топилган одамларни чегарага тортилган симлардан яширинча олиб ўтган. Учинчи гумонланувчи эса чегарани ноқонуний кесиб ўтганларни ташиб юрган. Маълум бўлишича, улар икки ой давомида 10 нафар ўзбекистонликни чегарадан олиб ўтган. Ушбу хизматлари учун уларнинг ҳар биридан 150 минг тенге олишган. Гумонланувчилардан бири Ўзбекистон фуқаросини чегарадан ноқонуний ўтказаётган пайтида қўлга олинган. Полиция далилий ашё сифатида унинг чўнтагидан қоғоз пулларни олиб қўйди.

«Ушбу ҳолат бўйича Жиноят кодексининг 394-моддаси «Ноқонуний миграцияни ташкил этиш« бўйича жиноят иши қўзғатилиб, тергов ҳаракатлари олиб борилмоқда. Ўзбекистон Республикаси фуқароларининг чегарани ноқонуний кесиб ўтган ҳаракатлари Жиноят кодексининг 392-моддаси (Қозоғистон Республикаси давлат чегарасини ноқонуний кесиб ўтиш) билан рўйхатга олинди. Ҳозирда судгача бўлган тергов ҳаракатлари олиб борилмоқда. Гумондорлар ҳибсга олинган», - дейилади хабарда.

Муаллиф: Айнур Ақбаева