Россиядаги ўрмон ёнғинлари туфайли 7 киши ҳалок бўлди

MOSKVA. Kazinform – Шанба куни ёнғинлар Красноярск ўлкасининг йигирмага яқин аҳоли пунктларини қамраб олди. Уларнинг сабаблари электр симларининг узилиши, қисқа туташувлар ва ёнғинга эҳтиётсизлик билан муносабатда бўлиш бўлган, деб хабар беради Kazinform ТАССга таяниб.

Ёнғинларнинг тез тарқалишига секундига 40 метрга етган кучли шамол ёрдам берди.

«Ёнғинлар натижасида етти киши ҳалок бўлди, 17 нафари жабрланди, улардан 14 нафари касалхонага ётқизилди. Барча ёнғинлар чекланди. Бу уларнинг кейинги тарқалиш хавфи минималлаштирилганлигини англатади. Вилоятнинг 13 та муниципал туманида ёнғинни ўчириш давом этмоқда», - дейилади Россия Фавқулодда вазиятлар вазирлиги хабарида.

Красноярск ўлкасидаги ёнғинлар натижасида зарар кўрган биноларнинг ярмидан кўпи турар-жой биноларидир. Ёнғин оқибатида жами 484 та бино зарар кўрган. Ёнғинларни ўчиришга 814 киши, 294 дона техника жалб этилган.

Россия президенти Владимир Путин табиий ёнғинларда ҳалок бўлганларнинг оила аъзолари ва яқинларига, шунингдек, ёнғин тарқалиши натижасида уй-жойидан айрилганларга ёрдам бериш учун барча чораларни кўришни топширди.