Репортаж: Нур-Султонда коронавирусдан даволашга мўлжалланган шифохона қурилиши бошланди

NUR-SULTAN. Kazinform – Қозоғистонда COVID-19 вирусли инфекциясига чалинганларни даволаш учун янги шифохоналар қурилмоқда, дея хабар беради Kazinform мухбири.

Нур-Султон шаҳар силга қарши кураш диспансери ёнида 200 ўринли касалхона қурилмоқда. BI Group қурилиш компанияси лойиҳани 10-12 кун ичида якунлашни режалаштирмоқда. Бунинг учун 500 га яқин қурувчи 3 сменада туну-кун ишлайди.

«Ҳозир биз Нур-Султан, Алмати ва Чимкентда учта лойиҳани амалга оширяпмиз. Нур-Султан ва Чимкентдаги лойиҳа 200 та тўшак-ўриндан иборат бўлиб, уларнинг ҳар бирида интенсив терапия учун 20 ўрин ажратилган. Алматидаги касалхона 280 одамга мўлжалланган, шундан 28 таси реанимация учун. Нур-Султандаги шифохона Modex заводи томонидан ишлаб чиқарилган модуллардан қурилади (...). Бундай монолит конструкциялардан 50-70 йил давомида фойдаланиш мумкин», - деди лойиҳа раҳбари Арман Лесбеков журналистларга.

Унинг сўзларига кўра, интенсив терапия палаталарини жиҳозлашда Жаҳон соғлиқни сақлаш ташкилотининг барча талаблари ҳисобга олинади. Бундан ташқари, Арман Лесбеков Алмати ва Чимкентдаги шифохоналар ўртасидаги фарқлар ҳақида гапириб берди.

«Алматидаги касалхона вахта шаҳарчаси шаклида бўлади. Вақт ва бюджет чекловлари туфайли биз ғарбий вилоятларда нефт билан шуғулланадиган корхона шаҳарчаси намунасини олдик. Учала комплексда ҳам экологик тоза воситалардан фойдаланилади», - деди у.

Муаллиф: Айжан Серикжанқизи