Президент топшириғи: Ақтўбеда Heriot-Watt University филиали очилади
Ақтўбе вилояти ҳокими Ерали Тоғжанов дунёнинг етакчи университетларидан бири Heriot-Watt University вакиллари билан учрашди. Томонлар Қ.Жубанов номидаги Ақтўбе вилоят университети ва Heriot-Watt University ўртасидаги ҳамкорлик доирасидаги ишларнинг боришини муҳокама қилдилар.
Ушбу учрашув Президент Қасим-Жомарт Тоқаевнинг олий таълим тизимини иқтисодиёт талабларига жавоб берадиган тарзда ислоҳ қилиш, жумладан, мамлакатда нуфузли хорижий техник олий таълим муассасаларининг филиалларини очиш бўйича топшириғи доирасида бўлиб ўтди.
Қайд этиш жоизки, Heriot-Watt University математика, кимё муҳандислиги, қурилиш, электротехника ва нефт-газ йўналишлари бўйича QS рейтинги бўйича дунёнинг энг яхши 200 та университетлари қаторига киради.
Олий таълим муассасалари ўртасидаги ҳамкорлик маҳаллий техник ва АТ мутахассисларни биргаликда тайёрлашга қаратилган. Шартномага кўра, Heriot-Watt University К.Жубанов номидаги Ақтўбе вилоят университети негизида учта бакалавриат таълим йўналиши – «Нефт ва газ бизнеси», «Электр энергетикаси», «Компьютер инжиниринги», шунингдек, «Саноатни бошқариш» мутахассислиги бўйича магистратура йўналишлари очилади. Бу мутахассисликлар минтақа эҳтиёжларига қараб танланади.
Ўқишни тамомлаган талабаларга Heriot-Watt University ва Қ.Жубанов номидаги Ақтўбе вилоят университетининг икки томонлама дипломи берилади. Академик мобиллик дастурлари фаол ишлаб чиқилади. Икки университет ўртасидаги стратегик ҳамкорлик муваффақиятли амалга оширилса, кейинги ўқув йилидан бошлаб бошқа вилоятлардан абитуриентлар қабул қилинади.
Учрашувда Heriot-Watt University филиали негизида минтақанинг АТ хабини яратиш масалаларида ҳамкорлик қилиш бўйича келишувларга эришилди.
Вилоят ҳокими Ерали Тоғжанов мазкур лойиҳаларни амалга оширишда маҳаллий ижро ҳокимияти органлари томонидан ҳар томонлама қўллаб-қувватланишини таъкидлади.