Президент Абай вилояти раҳбариятининг меҳнатини юқори баҳолади

SEMEİ. Каzinform – Қасим-Жомарт Тоқаев ўтган даврда катта ишлар қилинганини ва буни давом эттириш кераклигини таъкидлади, деб хабар беради Кazinform.

Давлат раҳбари мамлакатнинг маданий-тарихий маркази бўлган Семей шаҳри инфратузилмаси унинг мақомига мос келиши кераклигини таъкидлади. Абай вилояти ҳокими Қозоғистон Президентига берган маълумотида шаҳарни ривожлантириш масалаларига ҳам тўхталиб ўтди.

Давлат раҳбари Астана шаҳрида ижтимоий-иқтисодий ривожлантириш масалаларига бағишланган йиғилишда Абай вилояти ҳокими Нурлан Уранхаевнинг ҳисоботини тинглади. Қасим-Жомарт Тоқаев вилоятнинг маъмурий маркази алоҳида аҳамиятга эга эканини таъкидлади.

«Семей шаҳри мамлакатнинг энг гўзал ва тарихий марказларидан бири ҳисобланади. Шаҳар қиёфаси муносиб бўлиши учун уни ободонлаштиришга алоҳида эътибор қаратиш лозим. Албатта, инфратузилмани ҳам янгилаш керак, шунинг учун иш кўп», — деди Давлат раҳбари.

Нурлан Уранхаев ўз маърузасида Семей шаҳри бюджети сезиларли даражада ошгани ва шаҳарнинг энг долзарб ва муҳим муаммоларини ҳал этиш йўлларини қайд этди.

«Семей шаҳрининг тарихий-маданий ва янги маъмурий маркази мақоми, шунингдек, вилоят аҳолисининг қарийб 60 фоизи шаҳарда истиқомат қилаётганини ҳисобга олиб, вилоят марказини ривожлантириш алоҳида назоратга олинган. Шундай қилиб, жорий йилда Семей шаҳри бюджети 85 миллиард тенгедан ошди, бу ўтган йилга нисбатан қарийб 50 фоизга кўпдир», — деди вилоят раҳбари.

Уй-жой коммунал хўжалигини молиялаштириш ҳажми 1,4 баробар, аҳолини ижтимоий ҳимоя қилиш 1,5 баробар кўпайди.

2023-2024 йилларда Семей шаҳрини иссиқлик билан таъминлаш муаммоларини ҳал этиш мақсадида иссиқлик манбаларини ва тармоқларни модернизация қилиш бўйича Ҳудудларни ривожлантириш комплекс режасига қиймати 150 миллиард тенгедан ортиқ бўлган 30 та лойиҳа киритилди.

Ҳисобот якунида Давлат раҳбари амалга оширилган ишлар самарасини юқори баҳолаб, уни барча соҳаларда давом эттириш бўйича топшириқлар берди.

«Қисқа вақт ичида катта ишлар амалга оширилди. Буни тан олиш керак. Лекин олдинда ҳали кўп ишлар бор. Ечилмаган муаммолар бор. Шунинг учун бу иш комплекс тарзда олиб борилиши керак», - деди Қасим-Жомарт Тоқаев.