Покистондаги сув тошқинлари оқибатида 165 киши ҳалок бўлди
Воқеадан энг кўп жабр кўрган ҳудуд Балужистон провинцияси бўлиб, у ерда кучли ёмғирлар оқибатида сув тошқинлари сабаб 65 киши ҳалок бўлган, 49 киши жароҳатланган. Бир неча марта тўғон бузилиши ҳолатлари бўлган, натижада ўнлаб уйлар ва инфратузилмалар бузилиб кетган.
Синд провинциясида, жумладан, бир ҳафтадан кўпроқ вақтдан бери кучли ёғингарчилик остида қолаётган вилоят пойтахти Карачида содир бўлган алоҳида бахтсиз ҳодисаларда 38 киши ҳалок бўлди.
Покистон иқлим ўзгариши бўйича вазири Шерри Реҳманнинг айтишича, Синд ва Балужистонда 30 йиллик ўртача кўрсаткичдан мос равишда 625% ва 501% кўпроқ ёмғир ёққан. Ҳар икки провинция сўнгги 13 кундан бери кучли муссон босими остида.
Табиий офатларни бошқариш миллий бошқармаси маълумотларига кўра, Хайбер-Пахтунхвада кучли ёмғирлар оқибатида 24 киши, Панжобда 23 киши ва мамлакатнинг бошқа ҳудудларида 15 киши ҳалок бўлган.
Мамлакатда жами 1319 та ҳайвон нобуд бўлган. 350 га яқин уй бутунлай вайрон бўлиб, 781 та уй қисман зарар кўрган.
Расмийлар бутун мамлакат бўйлаб қутқарув ишларини олиб бормоқда. Жабрланганларга чодирлар, брезентлар, кўрпалар, чивинга қарши сеткалар, озиқ-овқат пакетлари ва қутқарув жилетлари берилади.
Фото: thesundaily.my