Покистон қимматбаҳо товарлар импортини тақиқлайди
Иқтисодий фавқулодда вазият туфайли Покистон ҳукумати зарур бўлмаган қимматбаҳо буюмларни импорт қилишни тўлиқ тақиқлади.
Тақиқланадиган товарлар орасида: автомобиллар, уяли телефонлар, маиший техника ва косметика мавжуд. Ушбу чора ёқилғи, озиқ-овқат ёғи ва дуккакли экинларга таъсир қилмайди.
Покистон Ахборот вазири Маррюм Аурангзебнинг айтишича, қимматбаҳо товарларга нисбатан тақиқ феврал-май ойлари орасида 16,3 миллиард доллардан 10 миллиард долларга тушган валюта захираларини сақлаб қолишга ёрдам беради.
Бундан ташқари, мазкур чора туфайли ҳукумат ҳар йили 6 миллиард долларгача тежашни режалаштирмоқда.
Баъзи прогнозларга кўра, бу йил Покистоннинг бюджет тақчиллиги тахминан 17 миллиард долларни ёки ЯИМнинг 4,5 фоизидан кўпроғини ташкил қилади.