ОПЕК+ давлатлари нефт қазиб олишни кунига 2 млн баррелга қисқартиришга келишиб олдилар

ASTANA. Kazinform – ҚР Энергетика вазирлиги матбуот хизмати томонидан Қўшма мониторинг қўмитасининг 45-йиғилиши ва ОПЕК+ 33-вазирлар йиғилиши якунлари эълон қилинди, дея хабар беради Kazinform.

2022 йилнинг 5 октябр куни ҚР Энергетика вазири Болат Ақшолақов Вена шаҳрида (Австрия) бўлиб ўтган ОПЕК+ келишувида иштирок этувчи давлатлар вазирлар йиғилиши ишида иштирок этди.

Учрашувда давлатлар томонидан август ойида шартнома бўйича мажбуриятларнинг бажарилиши муҳокама қилинди.

Битимнинг амал қилиш муддатини 2023 йил 31 декабргача узайтиришга қарор қилинди.

Иштирокчи давлатлар жорий йилнинг ноябр ойидан бошлаб нефт қазиб олишни 2022 йил август ойидаги даражасидан кунига 2 миллион баррелга қисқартиришга келишиб олдилар.

ОПЕК+ 19-йиғилишида тасдиқланган базавий даража ҳам тасдиқланди.

Мониторинг қўмитаси йиғилишини ҳар икки ойда, вазирлар йиғилишини ҳар олти ойда бир марта ўтказишга қарор қилинди. Ортиқча ишлаб чиқариш учун компенсация муддати 2023 йил 31 мартгача узайтирилди.

Қозоғистоннинг ноябр ойи учун мажбуриятлари кунига 1,628 миллион баррелни ташкил қилади.

Мамлакатлар ушбу Битим бўйича мажбуриятларни бажаришлари муҳимлиги тўғрисида яна бир бор келишиб олдилар.