Олимлар Гизадаги Буюк Пирамидада яширин йўлакни аниқладилар

АММАN. Kazinform - Миср Туризм ва қадимий ашёлар вазирлиги Гизадаги Буюк Пирамидасининг асосий кириш эшиги яқинида тўққиз метр узунликдаги яширин йўлак топилгани ҳақида маълум қилди, дея хабар беради Kazinform мухбири вазирлик баёнотига таяниб.

Қадимги дунёнинг сақланиб қолган етти мўъжизасининг охиргиси бўлган Хеопс пирамидаси номи билан ҳам танилган Буюк Гиза пирамидаси ичидаги кашфиёт Scan Pyramids лойиҳаси доирасида амалга оширилди. 2015 йилдан буён ушбу лойиҳада 3D моделлаштириш, эндоскоплар, шунингдек инвазив бўлмаган инфрақизил термография технологияси қўлланилиб, бу конструксия ичига «қараш» имконини беради.

«Пирамидани ўрганиш чоғида узунлиги 9 метр ва эни 2,1 метр бўлган йўлак аниқланди, лойиҳа устида иш 2015 йилдан бери давом этмоқда», — деди Миср туризм ва қадимий ашёлар вазири Аҳмад Исса.

«Тугалланмаган йўлак, эҳтимол, пирамиданинг оғирлигини ё деярли 7 метр нарида жойлашган асосий кириш эшиги атрофида ёки ҳали очилмаган бошқа хона ёки бўшлиққа тақсимлаш учун яратилган», — деди Мисрнинг Қадимий ашёлар олий кенгаши раҳбари Мустафо Вазирий.

«Биз нима қилишимиз мумкинлигини кўриш учун сканерлашни давом эттирамиз ... бу йўлакнинг остида ёки охирида нимани топишимиз мумкинлигини билиш учун», - деди у пирамида бўйича ташкил этилган матбуот анжуманида.

Пирамиданинг бошқа қисмидаги қиролнинг дафн хонаси устидаги бешта хона массив структуранинг оғирлигини қайта тақсимлаш учун қурилган деб ишонилади. Фиръавннинг бир нечта дафн хонаси бўлган бўлиши мумкин. Келгуси ойлар бизга бу йўлак ортида нима борлигини айтиб беради, - дея қўшимча қилди Вазирий.

Олимлар радар ва ультратовуш ёрдамида йўлак борлигини тасдиқладилар, сўнгра пирамида тошларидаги майда бўғим орқали 6 мм эндоскопни киритиш орқали тасвирини олишди.

Мисрлик тарихчи ва археолог Заки Хаваснинг таъкидлашича, бу замонавий даврдаги Хеопс пирамидаси билан боғлиқ энг муҳим кашфиётлардан биридир.

2017 йилда Scan Pyramids тадқиқотчилари Буюк Пирамида ичида камида 30 метр узунликдаги бўшлиқ топилганини эълон қилишди, бу XIX асрдан бери кашф этилган биринчи йирик ички тузилмадир.

Буюк Пирамида монументал қабр сифатида милоддан аввалги 2560 йилда қурилган. Фиръавн Хуфу ёки Хеопс ҳукмронлиги даврида. Баландлиги 146 метр бўлган Буюк Пирамида 1889 йилда Парижда Эйфель минораси қурилишидан олдин дунёдаги энг баланд сунъий иншоот бўлган.

Фото: Миср туризм ва қадимий ашёлар вазирлиги; BBC

Муаллиф: Арсен Ўтешев