Огайо штати аҳолиси заҳарли модда юкланган поезд рельсдан чиқиб кетганидан кейин бош оғриғи ва йўталдан шикоят қилмоқда

КОLUMBUS. Кazinform - Огайо штатининг Шарқий Фаластин шаҳри аҳолиси заҳарли модда олиб кетаётган поезд рельсдан чиқиб кетганидан сўнг бош оғриғи, йўтал ва хавотир, тери куйишидан шикоят қила бошлади, деб хабар беради Кazinform USА Тоdayга таяниб.

Огайо соғлиқни сақлаш департаменти ва АҚШ Соғлиқни сақлаш ҳамда ижтимоий хизматлар департаменти томонидан ўтказилган сўров натижалари жума куни эълон қилинди. Огайо губернатори Майк Девайннинг идораси баёнотида айтилишича, маҳаллий аҳоли ҳам чарчоқ, асабийлашиш, оғриқ ёки терининг куйишидан шикоят қилган.

Сўровда 168 киши иштирок этди. Респондентларнинг ўртача ёши 57 ёш, деярли барча респондентлар эса 18 ёшдан ошган.

Респондентларнинг деярли тўртдан уч қисми ёки 74 фоизи поезд рельсдан чиқиб кетганидан кейин бош оғриғи борлигини айтди. Ўнтадан олтитаси йўтал ҳақида хабар беришди ва ярмидан кўпи асабийлашиш, оғриқ ёки терининг куйиши ҳақида гапирди.

168 респондентнинг 64 фоизи безовталикни бошдан кечираётганини ва 58 фоизи ўзини ёмон ҳис қилаётгани ёки чарчаганини айтди.

Огайо губернаторлиги маълумотларига кўра, штат атроф-муҳитни муҳофаза қилиш агентлиги поезднинг рельсдан чиқиб кетиши билан боғлиқ чора-тадбирларнинг боришини кузатмоқда. Режага кўра, рельсларни демонтаж қилиш, темир йўлни қазиш ва реконструкция қилиш ишлари 30 апрелга қадар якунланиши керак.

Огайо атроф-муҳитни муҳофаза қилиш агентлигининг маълум қилишича, поезд ҳалокатидан кейин 1700 тоннага яқин қаттиқ чиқиндилар олиб ташланган.

Расмийлар одамлар уйларига қайтишлари мумкинлигини бир неча бор айтишган, чунки шаҳарда ҳаво ифлосланишининг даҳшатли даражалари аниқланмаган.

АҚШ атроф-муҳитни муҳофаза қилиш агентлиги Norfolk Southern бошқарув компаниясига Шарқий Фаластинда 38 та вагоннинг рельсдан чиқиб кетиши оқибатларини бартараф этиш харажатларини қоплашни буюрди.

Губернаторнинг сўзларига кўра, компания шикастланган асбоб-ускуналар учун ўт ўчириш бўлимларига 5 миллион доллар ва Бивер ва Лоуренс округларида бизнес эгалари ва аҳолига ёрдам бериш учун 1 миллион доллар товон тўлайди.

Эслатиб ўтамиз, феврал ойи бошида АҚШнинг Огайо штати шимоли-шарқида поезд ҳалокати катта ёнғинга сабаб бўлган эди. Поездда хавфли моддаларга тўла 20 та вагон бўлган, улардан 10 таси рельсдан чиқиб кетган. Бу 10 вагондан бештаси заҳарли модда бўлган винилхлоридни ташиётган бўлган.

Кенг миқёсдаги ёнғин ва маҳаллий аҳолининг соғлиғига таҳдид туфайли ҳукумат авария жойидан 1,6 километр радиусда аҳолини эвакуация қилишга қарор қилди. Шаҳарнинг бошқа аҳолисига ташқарига чиқиш тақиқланган.

Фото: zakonvremeni.ru