Нурсултон Назарбоев АҚШ Давлат котиби Майк Помпео билан учрашди
Суҳбат чоғида Майк Помпео Қозоғистоннинг Биринчи Президентига АҚШ Президенти Дональд Трампнинг илиқ муносабатини етказди.
Нурсултон Назарбоев икки мамлакатнинг стратегик шериклигини мустаҳкамлашга йўналтирилган саъи-ҳаракатлар ва чора-тадбирларга тўхталди.
– Мустақилликнинг илк йилларида биз «Шеврон» компанияси билан келишувга эришдик. Ўша лаҳзадан бошлаб Қозоғистонга Америка инвестициялари келишни бошлади. Бугунги кунда бизда 410 бирлашган корхона фаолият олиб бормоқдаю Америка инвестицияларининг ҳажми 45 миллиард доллардан ошиб кетди, - деди Елбасы.
Ўз навбатида Майк Помпео Қозоғистонга сафари ва музокаралар натижалари ҳақида маълумот берди.
– Мен Президент Қасим-Жомарт Тоқаев билан ва Қозоғистон Ташқи ишлар вазири билан муҳим учрашувлар ўтказдим. Сиз Америка Қўшма Штатларининг аввалдан келаётган дўстисиз. Мамлакатларимиз ўртасида ўзаро манфаатли шериклик шаклланган. Қозоғистондаги ижобий ўзгаришлар шахсан Сизнинг меҳнатингиз самараси деб биламан. Юртингизнинг ривожланиш суръатлари мени қойил қолдирди, - деди АҚШ Давлат котиби.