Нур-Султанда АRТ-ЕХPО халқаро кўргазмаси очилди

NUR-SULTAN. Кazinform - МДҲга аъзо давлатлар рассомлари ва амалий санъати усталарининг муҳим ютуқлари, йирик лойиҳалари, муҳим тадбирлари, маданий тадбирлари ва электрон маҳсулотлари – буларнинг барчасини Қозоғистон пойтахтидаги халқаро кўргазма ўтказиладиган Миллий музейга ташриф буюрувчилар кўришлари мумкин. МДҲга аъзо давлатларнинг АRТ-ЕХPО кўргазмаси очилди. Тадбир 10 сентябрга қадар давом этади, деб хабар беради Kazinform Маданият ва спорт ишлари вазирлиги матбуот хизматига таяниб.

«Қозоғистон Президенти Қасим-Жомарт Тоқаев 2022 йилни МДҲ мамлакатлари халқ ижодиёти ва маданий мероси йили деб эълон қилди. Бугунги «ART маконида халқ амалий санъати» кўргазмаси ана шу ғояни амалга ошириш доирасида ўтказилмоқда. Мамлакатларимиз ўртасидаги маданий алоқалар фаол ривожланиб, давлатларимиз фуқаролари бир-бирининг маънавий меросига самимий қизиқиш билдирмоқда. Бугун кўргазмани очар эканмиз, биз Қозоғистон, Ўзбекистон, Россия, Тожикистон ва Беларусдан келган рассомлар, ҳайкалтарошлар, амалий санъат усталарининг ижодий ишлари билан яқиндан танишишни таклиф этамиз. Ишончим комилки, кўргазма ташриф буюрувчилар қалбидан жой олиб, ўчмас таассурот қолдиради», — деди Маданият ва спорт вазири Даурен Абаев.

Қозоғистон павильонида мамлакат амалий санъати усталари иштирокида тўқимачилик, кулолчилик ва заргарлик буюмлари бўйича маҳорат дарслари бўлиб ўтади. Бундан ташқари, МДҲга аъзо давлатларнинг манфаатдор тузилмалари ва маданият ташкилотлари ўртасида ижодий алоқаларни йўлга қўйиш мақсадида уларнинг халқ амалий санъати соҳасидаги ютуқлари тақдимоти ўтказилади.

Шунингдек, тадбир доирасида МДҲга аъзо давлатларнинг Маданий ҳамкорлик кенгашининг бир қатор икки томонлама йиғилишлари, музей road-showси, шунингдек, ҚР Миллий музейи экспозиция заллари бўйлаб саёҳатлар ўтказиш режалаштирилган.

АRТ EХPО – Мустақил Давлатлар Ҳамдўстлиги доирасидаги комплекс тадбир бўлиб, ҳамкорликни ривожлантириш, миллатлараро тотувликни тарғиб қилиш, бошқа халқлар маданияти, тиллари ва анъаналарига ҳурмат кўрсатиш, ёш авлодда ватанпарварлик туйғусини шакллантиришга қаратилган.

Шунингдек, бугун Қозоғистон раислигида Миллий музейда МДҲга аъзо давлатлар Маданий ҳамкорлик кенгашининг ХХVII йиғилиши бўлиб ўтди. Томонлар МДҲ олий органлари томонидан тасдиқланган қатор ҳужжатлар ижроси, шунингдек, бўлажак тадбирларга тайёргарлик кўриш ва қўшма лойиҳаларни амалга ошириш билан боғлиқ масалаларни муҳокама қилди.

Фото:gov.kz