Москвада Каспий иқтисодий форуми бошланди
Форум давомида Каспий минтақасидаги савдо-иқтисодий ва илмий-техникавий ҳамкорликнинг асосий масалалари кўриб чиқилади. Асосий эътибор транспорт инфратузилмаси, энергетика, атроф-муҳитни муҳофаза қилиш, шунингдек, ҳудудлараро ҳамкорлик ва маданий-гуманитар алоқаларни ривожлантириш соҳасидаги қўшма лойиҳаларга қаратилиши режалаштирилган.
Жумладан, иштирокчилар умумий сув зонасининг балиқ ва бошқа ресурсларини биргаликда ўзлаштириш, ер ости бойликларини ўзлаштириш, шунингдек, ўзаро сармоявий ҳамкорликни кенгайтириш истиқболларини муҳокама қиладилар.
«Аминманки, бугунги учрашув якунлари бўйича биз Каспий минтақасида кўп қиррали ҳамкорликни ривожлантиришга туртки бўладиган ва пировардида давлатларимиз фуқаролари фаровонлигини оширишга хизмат қиладиган мутлақо аниқ қарорларга эришамиз «, - деди Россия Бош вазири Михаил Мишустин тор доирадаги учрашувни очиб берар экан.
Форумда миллий делегацияларга Қозоғистон Бош вазири Алихан Смаилов, Озарбайжон Бош вазири Али Асадов, Эрон биринчи вице-президенти Муҳаммад Мохбер, Россия Бош вазири Михаил Мишустин ва Туркманистон Вазирлар Кабинети раиси ўринбосари Хожамират Гелдимурадов бошчилик қилмоқда.
Иштирокчи мамлакатлар ҳукумат раҳбарлари иштирокида Каспий иқтисодий форумини ташкил этиш тўғрисидаги қарор Каспий «бешлиги» (Россия, Озарбайжон, Эрон, Қозоғистон ва Туркманистон) етакчилари томонидан 2018 йилда Ақтау шаҳрида бўлиб ўтган V саммитда қабул қилинган эди.
Форумнинг мақсади Каспий бўйи давлатларининг савдо-иқтисодий алоқалари ҳамда транспорт-логистика инфратузилмасини ривожлантиришдан иборат. I саммит 2019 йилнинг 11-12 август кунлари Туркманистонда бўлиб ўтди.
II КИФда Каспий «бешлиги» мамлакатлари, шунингдек, Беларусь, Қирғизистон ва Ўзбекистондан 1000 дан ортиқ делегатлар иштирок этмоқда.
Муаллиф: Наримбек Исмағулов