«Менинг исмим Хўжа» фильми Лондонда инглиз тилида намойиш этилади

НУР-СУЛТОН. Kazinform - «Менинг исмим Хўжа» фильми 6-10 июнь кунлари Лондон катта экранларида инглиз тилида намойиш этилади. Бу хақда Евроосиё кинофестивали директори Майра Қарсақбаева «Egemen Qazaqstan» газетасига берган суҳбатида маълум қилди.

Ушбу лойиҳани Лондоннинг «Romford film festival» компанияси молиялаштиради.

«Бу кўп йиллардан бери олиб борилган музокараларнинг мевасидир. Марказий Осиё мамлакатлари тарихида илк бор қозоқ киноси инглиз тилига ўгирилди. Фильм дубляжига Америка кино-театр санъати аъзолари жалб қилинди. Уларни излаб топиш ва улар билан келишувга эришиш осон кечгани йўқ», - дея таъкидлади Майра Қарсақбаева.

Таъкидлаш жоизки, «Romford film festival» қозоқ мумтоз киноси билан бошланади. Шунингдек, фестивал мобайнида қозоқ режиссери Азиз Зайировнинг «Қиз ва денгиз» киносининг премьераси бўлиб ўтади.

Эслатиб ўтамиз, қозоқ киносининг «шум боласи» бундан аввал ҳам хорижга сафар уюштирган. 2018 йилда таниқли ёзувчи Бердибек Соқпақбаевнинг «Менинг исмим Хўжа» асари илк бор турк тилига таржима қилиниб, Туркия кино иҳлосмандлари эътиборига ҳавола этилганди. Дунё халқларининг 67 тилига таржима қилинган асарни турк тилига Жамила Кинаджи ўгирган.