Мажилис депутатлари Туркистон вилоятидаги этномаданий бирлашмалар вакиллари билан учрашди
Йиғилишда юрт бирлигини мустаҳкамлаш, ижтимоий тотувликни таъминлаш борасидаги самарали ишлар, истиқболдаги мақсад ва вазифалар муҳокама қилинди.
Йиғилишда сўзга чиққан ҚР Парламенти Мажилиси депутати Мейрамбек Тўлепберген йиғилганларни яқинлашиб келаётган Мустақиллик байрами билан табриклаб, озод юрт мустақиллик йилларида улкан муваффақиятларга эришганини таъкидлади.
«Қадимий шаҳар туркий дунёнинг маънавий пойтахти ва гўзал шаҳарга айланди. Шу билан бирга, мажлис аъзолари ҳам ҳозирги Туркистоннинг ижтимоий-иқтисодий ривожланишига катта ҳисса қўшмоқда. Қишлоқ хўжалиги, тадбиркорлик, қурилиш, савдо соҳаларида меҳнат қилаётганлар кўп. Халқ ҳикматида «Бирлашган юрт ўзади, бирликсиз юрт тўзади» деган нақл бор. Ҳаммамиз бир отанинг фарзандларидай бир дарёнинг соҳилида аҳил бўлиб яшасак, енгиб бўлмайдиган тўсиқлар бўлмайди», - деди депутат.
Қозоғистон Парламенти Мажилиси депутати Фахриддин Қаратаев ҳам Ассамблеянинг жамиятдаги ўрни ва аҳамияти ҳақида гапирди.
«Ҳаммамизнинг мақсадимиз ва вазифаларимиз бир. Ассамблея ташкил топган кундан бошлаб юртимиздаги мустаҳкам ҳамжиҳатлик ва тўхтовсиз фаровонлик манбаи бўлиб келмоқда. Бу тузилма юрт тинчлиги ва барқарорлигининг асосий кафолатидир. Бугунги кунда 2 миллиондан ортиқ аҳолига эга Туркистон вилоятида 50 дан ортиқ миллат вакиллари истиқомат қилади. Вилоятда қозоқ тилининг мамлакатни бирлаштирувчи роли тобора ортиб бормоқда, бу эса Мустақиллигимиз пойдеворини янада мустаҳкамлаши шубҳасиз. Келгусида қишлоқ ва қўшни қишлоқларда дўстлик, тинчликни тарғиб этувчи тадбирларни янада фаоллаштириш ва тез-тез ўтказиш зарур. Бу мамлакатни мустаҳкамлашга, давлатчилигимиз шон-шуҳратини юксалтиришга катта ҳисса қўшиши аниқ», - деди депутат.
Бундан ташқари, йиғилишда Қозоғистон халқи Туркистон вилояти ассамблеяси ҳузуридаги Илмий-эксперт гуруҳи раҳбари К.А. Ясавий номидаги ХҚТУ ўқитувчиси, PhD доктор Қ.Қалдибай, Кентау шаҳар кенгаши депутати, Кентау шаҳар Оналар кенгаши аъзоси, С.Қожанов номидаги 9-мактаб директори У.Мусаханова, Туркистон вилояти тожик этномаданий бирлашмаси аъзоси Ф.Файзиддиновлар сўзга чиқиб, эл бирлигини мустаҳкамлаш бўйича ўз фикрларини билдирди.
Йиғилиш иштирокчилари савол-жавоб тарзида ўзаро фикр алмашдилар. Учрашувда йил давомида фаоллик кўрсатиб, ҳудудда бирдамлик ва тинчликни мустаҳкамлашга катта ҳисса қўшган бир қатор фуқаролар Қозоғистон халқи Ассамблеяси раиси ўринбосари М. Азилхановнинг ташаккурномаси билан тақдирланди. Йиғилишни сарҳисоб қилар экан, бошқарма бошлиғи Ансар Усербаев халқ ҳамжиҳатлигини мустаҳкамлаш, ижтимоий тотувликни сақлаш борасидаги тизимли ишлар бундан кейин ҳам давом этишини таъкидлади.
Эслатиб ўтамиз, куни кеча депутатлар Сайрам туманининг Ақсукент ва Қарабулоқ туманлари ҳамда Сауран туманида миллатлараро тотувликни мустаҳкамлаш мақсадида аҳоли билан учрашувлар ўтказди.
Муаллиф: Қайрат Зайнишев