ҚР Ҳукумати ўрта бизнесни қўллаб-қувватлаш бўйича комплекс дастур ишлаб чиқмоқда
ҚР Миллий иқтисодиёт вазирининг биринчи ўринбосари Тимур Жақсилиқовнинг маълум қилишича, 2023 йил 1 март ҳолатига кўра, республикада 2 910 та ўрта тадбиркорлик субъекти фаолият кўрсатмоқда, уларнинг ялпи ички маҳсулотдаги улуши 6,3 фоизни ташкил этади. Ушбу корхоналарда 380 мингга яқин киши банд.
VIII сайланган Парламентнинг биринчи сессиясининг очилишида Давлат раҳбари яқин йилларда ўрта бизнеснинг рақобатбардошлигини ошириш вазифасини қўйди. Шу муносабат билан ҚР Миллий иқтисодиёт вазирлиги ўрта корхоналар фаолиятини тартибга солиш тартиб-таомилларини соддалаштириш, солиқ тўловларини рағбатлантириш, инвестиция фаоллигини ошириш, маъмурий юкни камайтириш, ўрта корхоналарни, шу жумладан давлат харидлари соҳасини қўллаб-қувватлашни кенгайтириш бўйича чора-тадбирларни таклиф қилди.
Бош вазир қайд этилган ёндашувларни маъқуллади ва янги ташаббусларни ишлаб чиқиш жараёнига ишбилармон доираларни фаол жалб этиш муҳимлигини таъкидлади.
«Биз бу таклифлар бўйича, биринчи навбатда тадбиркорлик субъектларининг таклифларини ҳисобга олган ҳолда, яхши ишлашимиз керак. Уларни пухта ўрганиб, қонун ҳужжатларига, шунингдек, давлат органларининг тармоқ дастурларига тегишли ўзгартиришлар киритиш зарур»
, - деди Алихан Смаилов.
ҚР Индустрия ва инфратузилмаларни ривожлантириш вазири Мурат Қарабаевнинг маълум қилишича, бугунги кунда қайта ишлаш саноати соҳасида 501 та ўрта корхона фаолият кўрсатяпти. Кичик саноат зоналарини ишга тушириш, маҳаллий муҳандис-техник ходимларнинг хорижий заводларда амалиёт ўташини таъминлаш, асосий хом ашёни чуқур қайта ишлашни жонлантириш ва бошқа чора-тадбирлар орқали мазкур корхоналарни ривожлантириш ва янги лойиҳаларни амалга ошириш тавсия этилади.
Қозоғистон 10 триллион тенгедан ортиқ маҳсулот, иш ва хизматлар турларини маҳаллийлаштириш салоҳиятига эга, уларнинг бир қисмини ўрта корхоналар ишлаб чиқариши мумкин. Бу йўналишга туртки бериш мақсадида маҳаллий маҳсулотларга буюртмачилар рўйхатини кенгайтириш, шунингдек, тизим тузувчи ва квазидавлат корхоналари билан узоқ муддатли оффтейк-шартномаларини тасдиқлаш механизмларини ишлаб чиқиш кўзда тутилган.
«Атамекен» МТП раиси Раимбек Баталов инвестиция лойиҳаларини рақамли мониторинг қилиш имкониятлари билан таништирди ва ҳудудларни ривожлантиришда устувор йўналишларни давлат томонидан қўллаб-қувватлаш чора-тадбирларини кучайтиришнинг афзалликларини қайд этди. Шунингдек, бюджетдан молиялаштириладиган йирик лойиҳаларни амалга оширишга маҳаллий тадбиркорларни фаол жалб этиш зарурлигини таъкидлади.
Муҳокама якунлари бўйича, Бош вазир Давлат раҳбарининг топшириғига биноан ўрта тадбиркорликни ривожлантиришга алоҳида эътибор қаратиш вақти келганини таъкидлади.
«Ўрта бизнесни кучайтириш учун барча йўналишларни, хусусан, солиқ, маъмурий ва бошқа имтиёзларни кўриб чиқишимиз керак. Бу иш билан банд аҳоли сонини кўпайтириш ва корхоналар ходимларини ижтимоий ҳимоя қилишга, шаффофликни кенгайтиришга, умуман, иқтисодиётимизни ривожлантириш ва диверсификация қилишга хизмат қилади»
, - деди Алихан Смаилов.
Бундан ташқари, Ҳукумат раҳбари август ойи охиригача ўрта бизнесни қўллаб-қувватлаш бўйича комплекс дастурни ишлаб чиқишни якунлаш ва 2030 йилгача Кичик ва ўрта бизнесни ривожлантириш концепциясига киритиш имкониятларини кўриб чиқиш зарурлигини таъкидлади.
«Ҳужжат тадбиркорнинг барча эҳтиёжларини қондириши керак. Бу ишга тадбиркорнинг ўзини, экспертлар ҳамжамиятини, депутатлар, шунингдек, маҳаллий ижро ҳокимияти органлари, Президент Администрацияси вакилларини фаол жалб этиш зарур. Бу борада ҳамкорликда янги усулларни ишлаб чиқиш ва ўрта тадбиркорликни сифат жиҳатидан ривожлантиришнинг устувор йўналишларини белгилаш муҳим аҳамиятга эга»
, - деди бош вазир.
Фото: primeminister.kz