ҚР Президентига Бурабай, Марқакўл, Ортеке ЮНЕСКО рўйхатига киритилганлигини тасдиқловчи сертификатлар топширилди

ASTANA. Kazinform – ЮНЕСКО бош директори Одрэ Азуле ҚР Президенти Қасим-Жомарт Тоқаевга Бурабай ва Марқакўл қўриқхоналари глобал биосфера резерватлари тармоғига қўшилганлигини, шунингдек, Ортеке мусиқа ва қўғирчоқ санъати ЮНЕСКОнинг номоддий маданий мерослар рўйхатига киритилганлигини тасдиқловчи сертификатларни топширди, дея хабар беради Kazinform Ақордага таяниб.

Шунингдек, Одрэ Азуле Қасим-Жомарт Тоқаевга қозоқ заминида кўрсатган меҳмондўстлиги учун миннатдорлик билдириб, ЮНЕСКОнинг жаҳон маданий мероси рўйхатига киритилган Туркистон шаҳридаги Хўжа Аҳмад Яссавий мақбарасига ташрифи ҳақидаги таассуротлари билан ўртоқлашди.

Бундан ташқари, ЮНЕСКО Бош директори Қозоғистон Республикаси Президенти раҳнамолигида амалга оширилаётган кенг кўламли ислоҳотлар, жумладан, фуқаролик жамиятини мустаҳкамлаш, таълим ва маданиятни ривожлантиришга доир ташаббусларни юқори баҳолади.

«Қозоғистонга ташрифим мамлакатингиздаги муҳим стратегик даврга тўғри келди. Сиз кенг кўламли ислоҳотларни амалга оширяпсиз. Сизнинг президентлик мандатингиз бу масалада ҳал қилувчи роль ўйнаши керак», – деди Одрэ Азуле.

Эслатиб ўтамиз, бугун ҚР Президенти Қасим-Жомарт Тоқаев ЮНЕСКО Бош директори Одрэ Азулени қабул қилди.