ҚР Президенти Ҳукуматга қишлоқ хўжалиги аҳволини чуқур таҳлил қилиш бўйича топшириқ берди
Ақордада Қасим-Жомарт Тоқаев агросаноат мажмуаси соҳасидаги бизнес вакиллари билан учрашув ўтказди. Йиғилишда қишлоқ хўжалигини ривожлантиришнинг долзарб масалалари ва истиқболлари муҳокама қилинди.
Йиғилишда Президент ўтган йили қишлоқ хўжалиги соҳасида ўсиш 9,1 фоизни ташкил этганини таъкидлади. Унга кўра, ҳосил самарали бўлиб, фермерлар 23 миллион тоннага яқин ғалла йиғиб олди. Шунингдек, экин майдонларини диверсификация қилиш, серҳосил экинлар етиштиришга ўтиш ҳам режали амалга оширилмоқда. Мойли экинлар экин майдонлари қарийб 4 баробарга ошиб, 3,5 миллион гектарга етди. Давлат раҳбари таъкидлаганидек, ҳар кунги машаққатли меҳнати билан мамлакат озиқ-овқат хавфсизлигини мустаҳкамлашга катта ҳисса қўшаётган қишлоқ фуқаролари туфайли бундай ижобий натижага эришди.
Шу билан бирга, Президент аграр соҳага оид бир қатор долзарб масалаларни очиқ муҳокамалар доирасида кўриб чиқишни таклиф қилди.
Йиғилишда Қишлоқ хўжалиги вазири Ербол Қарашўкеев, «Родина» кўп тармоқли корхонаси директори Иван Сауэр, «Зенченко и К» қишлоқ хўжалиги ширкати директори Геннадий Зенченко, «Мойли экинларларнинг экспериментал хўжалиги» МЧЖ директори Фарид Абитаев сўзга чиқди.
Ишлаб чиқаришни диверсификация қилиш, хомашёни чуқур қайта ишлаш ва янги қишлоқ хўжалиги маҳсулотлари етиштириш, қанд саноати, уруғчилик, чорвачилик ва ветеринарияни ривожлантириш, шунингдек, ички бозорни таъминлаш ва экспорт салоҳиятини ошириш масалаларига тўхталди.
Йиғилишда агросаноат мажмуасини ривожлантириш учун маблағ ажратиш ва улардан фойдаланиш, ер ва сув ресурсларини адолатли тақсимлаш масалаларига алоҳида эътибор қаратилди.
Аграр хўжалик юритувчи субъектлар вакиллари қишлоқларда ҳаёт сифатини ошириш, йўл ва ижтимоий инфратузилма, жумладан, мактаб ва боғчалар ҳолатини яхшилаш, кадрлар тайёрлаш зарурлигини таъкидлади.
Президент маърузаларни тинглаб, Ҳукуматга барча таклифларни инобатга олиш, қишлоқ хўжалигининг аҳволини тадбиркорларнинг фикр-мулоҳазаларини инобатга олган ҳолда пухта таҳлил қилиш бўйича топшириқ берди. Давлат раҳбарининг таъкидлашича, агросаноат мажмуи вакиллари билан бундай учрашувларни мунтазам ўтказиб туриш керак. Чунки қишлоқ хўжалигидаги муаммоларга ечим топиш нафақат фуқароларнинг ҳаёт сифати, балки мамлакатнинг озиқ-овқат хавфсизлигини таъминлашга ҳам хизмат қилади.
