ҚР Президенти топшириқларини бажариш учун бюджетдан 1,8 триллион тенге ажратилади

NUR-SULTAN. Кazinform - Президент топшириқларини амалга ошириш учун республика бюджетидан 1,8 триллион тенге, ижтимоий соҳа харажатлари ва тенге курси учун 173 миллиард тенге, дастурий ҳужжатлар ва кечиктириб бўлмайдиган мажбуриятлар учун 476 миллиард тенге йўналтирилмоқда. Бу ҳақда Қозоғистон Бош вазири ўринбосари – Молия вазири Ерулан Жамаубаев маълум қилди, дея хабар беради Kazinform мухбири.

Сенатда Миллий жамғармадан 2022-2024 йилларга мўлжалланган кафолатланган трансфертлар тўғрисидаги қонунга ўзгартиришлар киритиш тўғрисидаги қонун лойиҳаси кўриб чиқилмоқда.

Эслатиб ўтамиз, аввалроқ қонун лойиҳаси Парламент Мажилиси томонидан маъқулланган эди.

«Жорий йилги республика бюджети параметрлари қуйидагилардан иборат. Бюджет даромадлари 2,7 триллион тенгега ошиб, 15,8 триллион тенгени ташкил қилди. Камомад ялпи ички маҳсулотга нисбатан 3,3% даражасида сақланиб қолди. Республика бюджетининг харажатлари 18,8 триллион тенге миқдорида режалаштирилган. Харажатларнинг қўшимча ўсиши 2,7 триллион тенгени ташкил этади ва бир қанча устувор йўналишлар бўйича кўзда тутилган», — деди Молия вазири Сенат мажлисида.

Унга кўра, Президент топшириқларини амалга ошириш учун биринчи навбатда 1,8 трлн тенге ажратилади.

Булар ички ишлар органлари ва фавқулодда вазиятлар хизматларининг жанговар тайёргарлиги ва жиҳозланишини кучайтириш, ҳудудлар ва тадбиркорлик субъектларини қўллаб-қувватлаш, аҳоли даромадларини ошириш, озиқ-овқат хавфсизлигини таъминлаш ва иқтисодиётни диверсификация қилишга қаратилган харажатлардир.

«Иккинчидан, макроиқтисодий кўрсаткичларнинг ўзгариши муносабати билан 173 млрд тенге миқдорида қўшимча маблағ ажратилади. Бу маблағлар ижтимоий харажатларга индексланади ва тенгенинг долларга нисбатан курсининг ўзгариши ҳисобига молиялаштирилади», — деди Е. Жамаубаев.

Учинчидан, дастурий ҳужжатлар ва оператив мажбуриятларни амалга ошириш учун 476 миллиард тенге йўналтирилади.

«Бюджетни қайта кўриб чиқиш натижасида реал сектор ва ҳудудларни қўллаб-қувватлаш кучайтирилди. Буни бюджет харажатлари тузилмаси ҳам кўрсатади. Яъни, харажатлар ўсишининг катта қисми иқтисодиётнинг реал секторини қўллаб-қувватлашга қаратилган. Бу 1,3 триллион тенге. Шунга кўра, ушбу йўналишнинг умумий харажатлардаги улуши 5 фоизга ошди. Натижада бу борадаги харажатлар 3,4 триллион тенге ёки умумий харажатларнинг 18 фоизини ташкил этиши режалаштирилган. Бундай имтиёзлар ўрта муддатли истиқболда мамлакат ривожланишига ижобий мультипликатив таъсир кўрсатади», - деди Молия вазири.

Муаллиф: Айжан Серикжанқизи