ҚР Президенти Швейцария Парламенти қуйи палатаси спикерини қабул қилди

NUR-SULTAN. Kazinform – Қасим-Жомарт Тоқаев Қозоғистонга расмий ташриф билан келган Швейцария Конфедерацияси Федерал Ассамблеяси Миллий Кенгаши (қуйи палата) раиси Андреас Эбидни қабул қилди, деб хабар беради Kazinform Ақордага асосланиб.

Давлат раҳбари Швейцария Қозоғистоннинг Европадаги энг муҳим шерикларидан бири эканлигини таъкидлаб, уларнинг саноат, «яшил» иқтисодиёт, қишлоқ хўжалиги ва молия соҳасидаги юқори инновацион салоҳиятини қайд этди.

Қозоғистон Президенти мамлакатда нефт бўлмаган секторида Швейцария сармояси ва технологияси иштирокида янги йирик лойиҳаларни амалга оширишга содиқлигини билдирди. Президентнинг фикрича, бу Қозоғистон иқтисодиётида швейцария бизнесининг аллақачон мустаҳкам ўрнини янада мустаҳкамлайди.

Швейцария – 2005 йилдан бери Қозоғистон иқтисодиётига 27 миллиард доллардан зиёд сармоя киритган энг йирик сармоядорлари учлигидан биридир. Қозоғистонда Glencore Xstrata, ABB, Philipp Morris, Rieter, Schindler, Bühler, Leica, Nestlé, Roche, Novartis, Syngenta, Ammann Group ва бошқа йирик компаниялар муваффақиятли фаолият кўрсатмоқда.

Шу билан бирга, Швейцария билан савдо айланмаси ўтган йили 1,7 миллиард долларга етиб, умумий савдо ҳажми бўйича 11 ўринни эгаллади. Давлат раҳбари Қозоғистон ва Швейцария ўртасидаги муносабатларнинг муваффақиятли ривожланишига икки мамлакат ўртасидаги яқин сиёсий алоқалар ёрдам беришига ишонч билдирди.

Шу муносабат билан Қасим-Жомарт Тоқаев яқинда Швейцария Президенти Гай Пармеланд билан мазмунли музокаралар ўтказганини таъкидлади.

Самарали алоқаларни давом эттириш учун Президент навбатдаги учрашувни шу йилнинг ноябрь ойи охирида ўтказишга тайёрлигини билдирди.