ҚР Президенти С.Сейфуллин номидаги Қозоқ агротехника университетига ташриф буюрди
Давлатимиз раҳбари таълим муассасасининг ўқув ва илмий-тадқиқот ишлари билан танишиб, ўқитувчилар ва талабалар билан суҳбатлашди.
Университет ректори Ақилбек Куришбаев Президентга молекуляр биология ҳамда ген инженериясининг замонавий услубларидан фойдаланган ҳолда олинган қишлоқ хўжалиги дон ўсимликларининг янги навларини кўрсатди. 5 йил ичида университет олимлари буғдой ва арпанинг қурғоқчиликка чидамли янги навларини яратишди.
Қасим-Жомарт Тоқаевга биоорганик моддалар ишлаб чиқаришда янги технологиялар, ветеринария тизимининг рақамлаштирилиши, жониворлар ҳисоби бўйича маълумотлар берилди.
Давлатимиз раҳбари ердан фойдаланиш жараёнини назорат қилиш имконини берувчи космосдан мониторинг қилиш ва Ерни масофадан зондлаш замонавий методлари билан танишди. Ушбу услублардан ҳозирда Ақтўбе ва Ақмола вилоятларида фойдаланилмоқда. Президент ушбу тажрибани бошқа ҳудудларда ҳам қўллаш кераклигини таъкидлади.
Қасим-Жомарт Тоқаевга университетнинг жаҳондаги етакчи илмий марказлар билан алоқалари ҳақида маълумот бериб ўтилди. Ақилбек Куришбаевнинг айтишича, Франциянинг AgroParisTech университети билан бирлашиб ишланган йўл харитаси Қозоқ агротехника университетининг халқаро ҳамкорлигининг асосий йўналишлардан биридир.
Талабалар билан суҳбат пайтида Қозоғистон Президенти илғор технологиялардан фойдаланиш муҳим аҳамиятга эга эканлигига тўхталди.
«Робот техникаси, рақамлаштириш ва сунъий интеллект – айниқса ривожланган мамлакатларда замон талаби. Биз ҳам ортда қолмаслигимиз керак. Яхши ўқисангиз, сизлар ҳам албатта келажакда ўз ўрнингизни топасиз. Бизга хусусий секторда ҳам, давлат секторида ҳам малакали мутаҳассислар керак», – деди Давлатимиз раҳбари.
Талабалар Президентга 2020 йил январидан бошлаб стипендия ҳажми 25 фоиз оширишни топширгани учун миннатдорчилик билдирди.
