ҚР Президенти Буюк Британия Ташқи ишлар вазирини қабул қилди

ASTANA. Kazinform – Президент Астана шаҳрига расмий ташриф билан келган Буюк Британия Ташқи ишлар вазири Жеймс Клеверлини қабул қилди, дея хабар беради Kazinform Ақордага таяниб.

Учрашувда сиёсий, савдо-иқтисодий, сармоявий ва гуманитар соҳаларда икки томонлама ҳамкорликни янада мустаҳкамлаш истиқболлари муҳокама қилинди.

Давлат раҳбари Буюк Британия вазирига эҳтиром кўрсатиб, унинг бугунги ташрифи икки мамлакат ҳамкорлигини янада мустаҳкамлашда минтақавий миқёсдаги аҳамиятли ва муҳим воқеа эканини таъкидлади.

«Сизнинг ташрифингиз Қозоғистон ва Буюк Британия ўртасидаги ўзаро ҳамкорликни янада мустаҳкамлашга янги суръат бағишлайди. Яқинда Ташқи ишлар вазирлигида қилган нутқингизни тингладим. Унда Буюк Британиянинг ташқи сиёсатдаги узоқ муддатли позицияси ўрин олган ва ҳақиқатда жуда муҳим масалалар тилга олинган»

, — деди Давлат раҳбари.

Қасим-Жомарт Тоқаев икки томонлама муносабатлар жадал ривожланаётганини таъкидлади.

«Ҳамкорлигимиз, айниқса, иқтисодий ва сиёсий соҳаларда жуда муваффақиятли эканини баҳоламоқчиман. Ўзаро муносабатларимизнинг ижобий йўналишини янада ривожлантириш учун қўшимча саъй-ҳаракатларни амалга оширишимиз керак», – деди Президент.

Суҳбат чоғида Президент Қасим-Жомарт Тоқаев Буюк Британия Бош вазири Риши Сунакга салом ва эзгу тилаклар йўллади. Шунингдек, у Буюк Британия ҳукумати раҳбарини ўзи учун қулай бўлган вақтда Қозоғистонга ташриф буюришни таклиф қилди. Ушбу ташриф икки томонлама муносабатларни мустаҳкамлашга қаратилган қатор аниқ масалаларни муҳокама қилиш учун яхши имконият эканини таъкидлади.

Ўз навбатида, Жеймс Клеверли Астана ва Лондон ўртасидаги муносабатлар жадал ривожланаётганини айтди. Унинг сўзларига кўра, Буюк Британия Қозоғистонда олиб борилаётган сиёсий ислоҳотларни ижобий баҳолайди.

«Мамлакатингиз минтақадаги асосий савдо шеригимиздир. Иқтисодий ўсишга йўналтирилган режани амалга ошириш учун биргаликда ишлаш учун яхши имкониятни кўрамиз. Қозоғистонда амалга оширилаётган солиқ ислоҳотлари дастури ўзаро манфаатли иқтисодий алоқаларни мустаҳкамлашга хизмат қилади, деб ҳисоблайман», — деди Буюк Британия Ташқи ишлар вазири.

Бундан ташқари, учрашувда Қасим-Жомарт Тоқаев ва Жеймс Клеверли минтақавий ва халқаро кун тартибидаги долзарб масалалар юзасидан фикр алмашди.