ҚР Президенти Бош вазирга овулларни дори-дармонлар билан таъминлашни топширди
Давлат раҳбари Бош вазирнинг эпидемиологик вазиятни барқарорлаштириш ва мамлакатни ижтимоий-иқтисодий ривожлантириш тўғрисидаги ҳисоботини тинглади.
Асқар Маминнинг сўзларига кўра, мамлакатда коронавирус инфекциясини юқтирганлар сони 2,1 фоизга камайган, касалхоналардаги ётадиган жойларнинг умумий сони эса 30,4 мингдан 49,7 минггача кўпайтирилди. Шунинг натижасида реанимацияга ётқизишга бўлган эҳтиёжи 12 фоизга ва стационарларда 25 фоизга камайди. Бундан ташқари, COVID-19 инфекциясидан соғайганлар сони 63%га ошди, тез ёрдам чақирувлари сони эса 31%га камайди.
Бош вазир Қозоғистон Президентига барча вилоятлардаги барқарорлаштириш жамғармаси зарур дори-дармонлар ва тиббий жиҳозлар билан тўлдирилаётгани, касалхоналар сунъий шамоллатиш ва кислород контсентраторлари билан таъминланаётгани ҳақида хабар берди.
Асқар Мамин Қасим-Жомарт Тоқаевга чеклов чоралари давомида тадбиркорлик субъектларини қўллаб-қувватлаш, бандлик ва мамлакатни ижтимоий-иқтисодий ривожлантириш билан боғлиқ долзарб масалалар ҳақида гапириб берди.
Президент Бош вазирга ҳудудларни, айниқса қишлоқларни зарур дори-дармонлар ва тиббий жиҳозлар билан таъминлашни топширди.
Президентнинг сўзларига кўра, пандемия пайтида ва ундан кейин Ҳукумат олдида иқтисодиётнинг режалаштирилган ривожланишини таъминлаш ва фуқароларнинг ижтимоий эҳтиёжларини қондириш вазифаси турибди. Айни пайтда янги иқтисодий йўналишни ривожлантириш бўйича ишлар олиб борилмоқда. Бу Давлат раҳбарининг яқинда эълон қилинадиган мурожаатида муҳим ўрин тутади.