ҚР Миллий иқтисодиёт вазири Citigroup банки вакиллари билан иқтисодий ҳамкорликни муҳокама қилди

NUR-SULTAN. Kazinform - Қозоғистон Миллий иқтисодиёт вазири Алибек Қуантиров Вашингтонда ҳукуматлар глобал блоки ва Citigroup банкининг давлат сектори раҳбари Жули Монако билан учрашди. Бу ҳақда Kazinform вазирлик матбуот хизматига таяниб хабар беради.

Учрашувда ўзаро манфаатли ҳамкорлик, жумладан, сармоя жалб этиш ва қўшма лойиҳаларни амалга ошириш масалалари муҳокама қилинди.

Хусусан, Миллий иқтисодиёт вазири Қозоғистондаги иқтисодий вазият, ҳукуматнинг глобал нотинчликка қарши чоралари, Давлат раҳбари ташаббуси билан амалга оширилаётган солиқ-бюджет сиёсатидаги ўзгаришлар ва ижтимоий-иқтисодий ислоҳотлар ҳақида гапирди.

Вазир жорий этилаётган, бюджетнинг узоқ муддатли барқарорлигини таъминлаши керак бўлган контрацикл бюджет қоидаларига алоҳида тўхталиб ўтди.

Ўз навбатида, Жули Монако Қозоғистонда амалга оширилаётган ислоҳотларни ижобий баҳолади ва инвестиция жозибадорлигини сақлаб қолиш учун уларни келгусида давом эттириш муҳимлигини таъкидлади.

Бундан ташқари, томонлар «яшил» иқтисодиётни ривожлантириш масалаларини муҳокама қилдилар. А.Қуантиров Қозоғистон 2060 йилгача углерод нейтраллигига эришиш учун барча саъй-ҳаракатларини амалга оширишини таъкидлади. Давлат, шунингдек, иқтисодиётнинг корпоратив ва квази-давлат секторларида ESG стандартларини фаол жорий этишни рағбатлантиради.

Учрашув якунлари бўйича суҳбатдошлар ўзаро ҳамкорликни кучайтириш ва иқтисодий ҳамкорликни янги босқичга олиб чиқишга келишиб олдилар.

Фото : gov.kz